Zeınetaqy jınaǵynyń 50% paıdalaný: Memleket UB basqaratyn bóligine ǵana kepildik beredi

ASTANA. QazAqparat – 2024 jyldyń 1 qańtarynan bastap jumys berýshiler tarapynyn qosymsha zeınetaqy jarnalary engizileldi. Bul týraly búgin Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

Qazirgi qoldanystaǵy júıe zeınetkerlerdiń úsh býynyn qamtıdy. Qarastyrylǵan ózgeristerde 1998 jylǵa deıin jáne 1998 jyldan keıin zeınetke shyqqan azamattar zeınetaqy tólemderiniń negizgi bóligin memleketten, al bolashaq zeınetkerler Jınaqtaýshy zeınetaqy júıesinen alatyn bolady. Osy maqsatta búgingi zeınetkerler úshin bazalyq jáne eńbek zeınetaqylarynyń mólsherin esepteý parametrleri ózgeredi. Bul ózgeris atalǵan zeınetaqylardyń mólsherin kóbeıtý maqsatynda qarastyrylyp otyr. Al bolashaq zeınetkerler úshin 2024 jyldyń 1 qańtarynan bastap jumys berýshiler tarapynyn qosymsha zeınetaqy jarnalary engiziletin bolady», - dedi mınıstr.

Sonymen qatar ol jańa Áleýmettik kodekste salymshylardyń óz aktıvterin basqarý jónindegi quqyqtaryn keńeıtý boıynsha ózgerister engizilgenin atap ótti.

«Endi azamattar belgilengen jetkiliktik sheginen asqan zeınetaqy jınaqtaryn tek emdelýge jáne turǵyn úı satyp alýǵa jumsaı alady. Sondaı-aq salymshylarǵa zeınetaqy jınaqtarynyń 50 paıyzdan aspaıtyn bóligin aktıvterdi basqarý kompanııasyna berý jáne mundaı kompanııany ózderi tańdaý quqyǵy beriledi. Bul rette memleket zeınetaqy jınaqtarynyń saqtalýyna kepildikti jınaqtyń Ulttyq bank basqaratyn bóligine ǵana beretinin atap ótken jón», - dedi Tamara Dúısenova.

Al jeke basqarýǵa beriletin zeınetaqy jınaqtarynyń saqtalýyna jáne onyń tabystylyǵyna salymshy tańdap alǵan kompanııa jaýapty bolady. Sondyqtan árbir salymshy basqarý jónindegi jeke kompanııany tańdaǵan kezde yqtımal táýekelderdi muqııat eskerýi tıis bolady.
Buǵan deıin zeınetaqy jınaǵynyń 50 paıyzyn jeke kompanııalarǵa aýdarý múmkindigi jasalatyndyǵy týraly habarladyq. Jýyrda bul qujatty Parlament qaraıtyn bolady.