Zeınetaqy jınaǵyn jeke kompanııalarǵa berý: Qujatty Parlament qashan qaraıdy

ASTANA. QazAqparat – QR Qarjy naryǵyn retteý jáne damytý agenttiginiń tóraǵasy Mádına Ábilqasymova el azamattarynyń Biryńǵaı jınaqtaýshy zeınetaqy qoryndaǵy jınaqtarynyń 50 paıyzyn jeke kompanııalarǵa basqarýǵa berýge qatysty Májilis depýtattarynyń saýalyna jaýap berdi, dep habarlaıdy QazAqparat tilshisi.

«Memleket basshysy 2022 jylǵy 12 jeltoqsandaǵy Qazaqstan Respýblıkasy Úkimetiniń keńeıtilgen otyrysynda Biryńǵaı jınaqtaýshy zeınetaqy qory (budan ári – BJZQ) salymshylarynyń óz zeınetaqy jınaqtarynyń 50 paıyzyna deıin jeke basqarýǵa berý jónindegi quqyqtaryn keńeıtý bóliginde tapsyrma berdi. «Ádiletti memleket. Birtutas ult. Berekeli qoǵam» atty Memleket basshysynyń 2022 jylǵy 1 qyrkúıektegi Qazaqstan halqyna joldaýyn iske asyrý jónindegi jalpyulttyq is-sharalar josparynyń 66-tarmaǵynda jeke kompanııalardy zeınetaqy aktıvterin basqarýǵa tartý múmkindigin kózdeıtin BJZQ-nyń tıimdi ınvestıtsııalyq strategııasyn ázirleý boıynsha sharalar qabyldaý kózdelgen», - dep atap ótedi agenttik tóraǵasy.

Onyń atap ótýinshe, atalǵan tapsyrmalardy oryndaý aıasynda agenttik BJZQ-nyń barlyq salymshylaryna eń tómengi jetkiliktilik sheginiń bolýyna qaramastan ózderiniń zeınetaqy jınaqtarynyń 50 paıyzyna deıin jeke basqarýǵa berýge múmkindik usynýdy kózdeıtin tıisti zańnamalyq túzetýler ázirlep, olardy Qazaqstan Respýblıkasynyń Áleýmettik kodeksiniń jobasynda iske asyrý úshin Eńbek jáne halyqty áleýmettik qorǵaý mınıstrligine jibergen.

«Qazaqstan Respýblıkasy Úkimetiniń zań jobalaý jumystarynyń 2022 jylǵa arnalǵan josparyna sáıkes, Áleýmettik kodekstiń jobasyn Qazaqstan Respýblıkasynyń Parlamentine engizý 2022 jylǵy jeltoqsanǵa josparlanǵan», - dedi Mádına Ábilqasymova.

Buǵan deıin zeınetaqy jınaǵynyń 50 paıyzyn jeke kompanııalarǵa aýdarý múmkindigi jasalatyndyǵy týraly habarladyq.