Zeınetaqy jınaǵyn senimgerlik basqarýǵa berý: Kompanııalarǵa qoıylatyn talaptar

NUR-SULTAN. QazAqparat – Qazaqstandyqtar zeınetaqy jınaqtarynyń bir bóligin senimgerlik basqarýǵa bergen kezde basqarýshy kompanııaǵa qandaı talap qoıylady. Bul saýalǵa búgin QR Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva jaýap berdi, dep habarlaıdy QazAqparat tilshisi.

«Zeınetaqy jınaqtaryn ınvestıtsııalyq portfeldi basqarýǵa arnalǵan lıtsenzııasy, keminde 3 mlrd teńge mólsherindegi menshikti kapıtaly, sońǵy úsh jylda klıentterdiń 5 mlrd teńge mólsherindegi aktıvterin basqarý tájirıbesi, sondaı-aq sońǵy eki jyl ishinde shyǵyndy qyzmet faktileri joq kompanııalarǵa berýge bolady», - dedi Marııa Hadjıeva.

Onyń atap ótýinshe, sapalyq ólshemsharttardyń arasynan sońǵy 6 aı ishinde prýdentsııalyq normatıvterdi buzý faktileriniń, oryndalmaǵan qadaǵalap den qoıý sharalarynyń, sanktsııalardyń bolmaýyn, sonymen qatar basqarýshyda iri qatysýshynyń bolýyn atap ótýge bolady.

Aǵymdaǵy sátte agenttiktiń ınvestıtsııalyq portfeldi basqarýǵa arnalǵan lıtsenzııasy bar 18 basqarýshy kompanııanyń 6-ýy bekitilgen talaptarǵa sáıkes keledi.

«Basqarýshy kompanııalardyń tizimi agenttiktiń saıtynda jarııalandy. Basqarýshy kompanııalardy bul tizimge engizý basqarýshy kompanııalardyń zeınetaqy aktıvterin basqarý jónindegi qyzmetterdi kórsetetinin bildirmeıdi. Sheshimdi kompanııanyń ózi jáne onyń aktsıonerleri qabyldaýǵa tıis. Zeınetaqy jınaqtaryn bul kompanııalardyń basqarýyna berý úshin olar senimgerlik basqarýǵa jáne kastodıandyq qyzmet kórsetýge sharttar jasaýy qajet. BJZQ óziniń ınternet-saıtynda ózi senimgerlik basqarýǵa sharttar jasaǵan basqarýshy kompanııalardyń tizimin jarııalaıdy. Sodan keıin salymshylar óz jınaqtaryn bul kompanııalardyń basqarýyna aýdarýǵa quqyly»,- dedi ol.