Zeınetaqy jınaǵyn senimgerlik basqarýǵa bergen salymshy qansha syıaqy alady
Redaktsııanyń saýalyna joldanǵan jaýapta senimgerlik kompanııalar salymshynyń zeınetaqy jınaǵyn qandaı ınvestıtsııalyq jobalarǵa sala alatyny aıtylǵan.
«BJZQ-dan zeınetaqy aktıvterin alǵannan keıin ınvestıtsııalyq portfeldi basqarýshy kompanııa olardy Ulttyq banktiń 2014 jylǵy 3 aqpandaǵy №10 qaýlysymen bekitilgen Investıtsııalyq portfeldi basqarý jónindegi qyzmetti júzege asyrý qaǵıdalary men senimgerlik basqarý kompanııalarynyń deklaratsııasy boıynsha qarjy quraldaryna ınvestıtsııalaıdy. Zeınetaqy aktıvterin ınvestıtsııalaý kezinde bank depozıtindegideı syıaqy kózdelmegen», - dep jazylǵan resmı jaýapta.
Basqarýshy kompanııa salymshynyń zeınetaqy jınaqtaryn ornalastyrýdan qandaı ınvestıtsııalyq tabys eseptegenin enpf.kz saıtyndaǵy jeke kabınetke kirip, «qyzmetter» bóliminde jeke zeınetaqy shotynyń úzindi kóshirmesinen kórýge bolady. Salymshy senimgerlik kompanııanyń ár qadamyn baqylap qana qoımaı, jylyna bir ret senimgerlik basqarý kompanııasyn aýystyra alady. Al jınaǵyn qaıtadan BJZQ-ǵa aýdarý úshin senimerlik basqarýǵa berilgen kúnnen bastap eki jyl kútý kerek.
«Senimgerlik kompanııada turaqty qalsa, salymshynyń zeınetker jasyna tolýyna kúntizbelik 10 kún qalǵanda barlyq ınvestıtsııalyq kiristeri eseptele otyryp, Ulttyq banktiń basqarýyna qaıtarylady. Jınaqtalǵan qarjyny salymshy keste boıynsha zeınetaqy tólemi retinde alýyna bolady. Zeınetaqy annýıteti shartyn jasasý úshin nemese zańnamada kózdelgen ózge de maqsattarǵa paıdalana alady», - deıdi qor ókilderi.