Zeınetaqy jınaǵyn paıdalaný: Páter alýda qandaı kedergi bar
«Statıstıka derekteri boıynsha 2019 jyly qurylys jumystarynyń kólemi 4,4 trln teńgeni, onyń ishinde turǵyn úı qurylysynyń kólemi 881 mlrd teńgeni qurady. Sonymen birge, turǵyn úı qurylysyna úlestik qatysýshylarǵa joǵary talaptarǵa baılanysty turǵyn úıdiń negizgi kólemi «Turǵyn úı qurylysyna úlestik qatysý týraly» Zańnyń qoldanystaǵy talaptarynan tys satylady. Aıtalyq, «Turǵyn úı qurylysyna kepildik berý qory» AQ-nyń derekteri boıynsha respýblıka boıynsha 20 qurylys salýshy ǵana (NurSultan - 6, Almaty - 8, Shymkent - 1, Qaraǵandy - 1, Aqtaý - 1, Atyraý - 2, Aqtóbe qalalary - 1) 262 mlrd teńge somasyna nemese jalpy kólemniń 1/3-inen az nysandardyń shekti sanyn salýǵa kepildigi bar», - dedi ol.
Onyń atap ótýinshe, qurylys salýshylardyń derekteri boıynsha, atalǵan turǵyn úı kólemi is júzinde iske asyryldy. Turǵyn úıdiń qalǵan kólemi belgilengen qaǵıdalardan tys - brondaý, ınvestıtsııalaý, rezervteý jáne ózge de sharttar arqyly satylady.
«Osynyń saldarynan, bastapqy turǵyn úıdiń aıtarlyqtaı bóligi zeınetaqy jınaqtaryn alýshylar úshin qoljetimsiz. Sebebi olardy maqsatty paıdalaný zańnamaǵa sáıkes jasalǵan turǵyn úı qurylysyna úlestik qatysý sharttarymen ǵana rastalady. Osyny eskere otyryp, turǵyn úı qurylysy naryǵynda básekelestikti damytý úshin Ulttyq joba aıasynda taýar naryǵyna kirýdiń negizgi kedergisi retinde turǵyn úı qurylysyna úlestik qatysýyshylarǵa qoıylatyn talaptardy azaıtý máselesi pysyqtalyp jatyr», - dedi Serik Jumanǵarın.
Eske salsaq, 2 qańtarda QR Prezıdenti Qasym-Jomart Toqaev zeınetaqy jınaǵynyń bir bóligin maqsatty paıdalanýǵa qatysty zańǵa qol qoıdy.
Qazaqstandyqtardyń zeınetaqy jınaqtaryn paıdalaný úshin jańartylǵan «jetkiliktilik shegi» jarııalandy. Zeınetaqy jınaǵynan alýǵa bolatyn soma BJZQ saıtynda avtomatty túrde kórsetiledi.
23 qańtardan Qazaqstanda zeınetaqynyń bir bóligin alýǵa ótinim qabyldaý bastaldy. Arnaıy portalda zeınetaqynyń bir bóligin alýǵa ótinim qabyldaý bastalǵaly úsh saǵattyń ishinde 4 myńnan astam adam ótinish berdi.