Zeınetaqy jınaǵyn paıdalaný: Basqarýshy kompanııalarǵa beriletin qarajattan tabys salyǵy alynbaıdy

NUR-SULTAN. QazAqparat – Biryńǵaı jınaqtaýshy zeınetaqy qorynan basqarýshy qorǵa berilgen qarajattan tabys salyǵy alyna ma? Bul saýalǵa QR Qarjy naryǵyn retteý jáne damytý agenttigi Qundy qaǵazdar naryǵy departamentiniń dırektory Edil Medeý jaýap berdi, dep habarlaıdy QazAqparat tilshisi.

«Salymshylardyń zeınetaqy jınaqtarynyń bir bóligin basqarýshy kompanııanyń jeke basqarýyna aýdarýy birrettik zeınetaqy tólemin alýǵa jatpaıdy. Óıtkeni, jeke basqarýǵa berýge bolatyn zeınetaqy jınaǵy Biryǵaı jınaqtaýshy zeınetaqy qory júıesinde qalady. Osylaısha, jeke basqarýǵa berilgen zeınetaqy aktıvinen jeke basqarýǵa berilgen sátte tabys salyǵy alynbaıdy», - dep túsindiredi Edil Medeý.

Eske salsaq, 2 qańtarda QR Prezıdenti Qasym-Jomart Toqaev zeınetaqy jınaǵynyń bir bóligin maqsatty paıdalanýǵa qatysty zańǵa qol qoıdy.

Qazaqstandyqtardyń zeınetaqy jınaqtaryn paıdalaný úshin jańartylǵan «jetkiliktilik shegi» jarııalandy. Zeınetaqy jınaǵynan alýǵa bolatyn soma BJZQ saıtynda avtomatty túrde kórsetiledi.

23 qańtardan Qazaqstanda zeınetaqynyń bir bóligin alýǵa ótinim qabyldaý bastaldy. Arnaıy portalda zeınetaqynyń bir bóligin alýǵa ótinim qabyldaý bastalǵaly úsh saǵattyń ishinde 4 myńnan astam adam ótinish berdi.