Zeınetaqy jınaǵy jetkilikti bolǵan jaǵdaıda áıelder úshin 50 jasta zeınetke shyǵý quqy saqtalady - S. Ábdenov
ASTANA. 17 sáýir. QazAqparat - Zeınetaqy jınaǵy jetkilikti bolǵan jaǵdaıda áıelder úshin 50 jasta zeınetke shyǵý quqy saqtalady.
Búgin Parlament Májilisiniń jalpy otyrysynda «Qazaqstan Respýblıkasynda zeınetaqymen qamsyzdandyrý týraly» zań jobasy boıynsha baıandaǵan Eńbek jáne halyqty áleýmettik qorǵaý mınıstri Serik Ábdenov osylaı málim etti.
Toqtala ketetin jaıt, zań jobasyndaǵy basty jańalyqtardyń biri áıelderdiń zeınetkerlik jasyn birizdendirý bolyp tabylady. «Áıelder úshin zeınetkerlik jasyn er azamattarmen teńestirý olardyń ózderi úshin zeınetaqy mólsherin arttyrýǵa degen múmkindikti qamtıdy. Qosymsha bes jylǵa arttyrý zeınetaqy jınaqtarynyń ósimin on bes paıyzǵa kóbeıtýdi qamtamasyz etedi. Sonymen qatar, áıelderdiń zeınetkerlik jasyn arttyrý keler jyldan bastalyp, 2023 jylǵa deıin on jyl boıy, jyl saıyn alty aıǵa kóterile otyryp, júzege asady. Máselen, 1956 jyly týylǵan áıel kelesi jyly 58 jasqa tolady, al ol zeınetkerlikke 58-de emes, 58,5 jasynda shyǵady», deıdi S. Ábdenov. Onyń aıtýynsha, áıelder úshin erterek zeınetkerlikke shyǵý quqyqtary da saqtalady.
«Birinshiden, zeınetaqylyq jınaqtary jetkilikti bolǵanda áıelderge elý jasynda zeınetke shyǵý quqy saqtalady. Ekinshiden, 20 jyl eńbek ótili bolǵanda, bes jáne odan da kóp bala týǵan áıelderge 58 jasta zeınetke shyǵýǵa bolady. Úshinshiden, Semeı ıadrolyq synaq alańdaryndaǵy synaq saldarynan japa shekkender, joǵary radıatsııalyq aımaqtarda turǵandar 20 jyl eńbek ótili bolǵanda 45 jasynda zeınetke shyǵa alady», dedi S. Ábdenov.
