Zeınetaqy jınaǵy: 147 myńnan astam qazaqstandyq baspanaly boldy
«Búgingi kúni 147 myń qazaqstandyq úı ıesi atandy, taǵy 72 myńnan astamy ıpotekalyq qaryzyn ótedi jáne 18 myńǵa jýyq adam zeınetaqy qoryndaǵy qarajatynyń bir bóligin emdelýge jumsady. Olardyń úshten biri – áıelder (75 493) jáne úshten ekisi – er azamattar (161 879). Birjolǵy zeınetaqy tólemderin qoldaný boıynsha birinshi orynda Mańǵystaý oblysynyń turǵyndary tur (36 853 adam), olar jalpy somasy 326 mlrd teńge paıdalanǵan. Ekinshi orynda Nur-Sultan qalasy (36 339 adam), elorda turǵyndary 217 mlrd-qa jýyq teńge qoldanǵan. Almaty qalasy – úshinshi orynda (31 438 adam), almatylyqtar jalpy somasy 241 mlrd-qa jýyq teńgeni turǵyn úı jaǵdaıyn jaqsartý jáne emdelý aqysyn tóleýge jumsaǵan. ıAǵnı birjolǵy zeınetaqy tólemin enpf-otbasy.kz platformasy arqyly turǵyn úı jaǵdaıyn jaqsartýǵa jáne emdeý úshin jumsaýǵa bolady», - dedi Janar Joltaeva.
Onyń aıtýynsha, zeınetaqy qoryndaǵy jınaǵyn Mańǵystaý oblysynyń 40 pen 59 jas aralyǵyndaǵy er azamattar jıi paıdalanǵan. Áıelder arasynda Nur-Sultan qalasynyń 40 pen 59 jas aralyǵyndaǵy qyz-kelinshekteri kósh bastap tur.
«Bıyl qańtar aıynan qazaqstandyqtarǵa turǵyn úı jaǵdaıyn jaqsartý jáne emdelý aqysyn tóleý boıynsha biryńǵaı jınaqtaýshy zeınetaqy qorynan birjolǵy zeınetaqy tólemderin paıdalaný múmkindigi berildi. Ol úshin arnaıy onlaın platformasy iske qosyldy. Sonymen qatar ol jerde jeke shot ashý múmkindigi de qarastyrylǵan. Osy ýaqyta aralyǵynda 237 372 adam atalǵan onlaın qyzmet arqyly 1 trln 344 mlrd teńgeni quraıtyn zeınetaqy qoryndaǵy tólemin paıdalandy», - deıdi ol.
Sondaı-aq, bank ókili zeınetaqy jınaǵyndaǵy tólemge úıge jóndeý jumystaryn jasaýǵa da bolatynyn aıtty.
«Odan bólek, 11 myńnan astam adam birjolǵy zeınetaqy tólemin ekinshi sanattaǵy úılerdi satyp alýǵa jumsaǵan jáne 2 myńnan astam adam birinshi sanattaǵy turǵyn úılerdi satyp alǵan, ıaǵnı jańa úıler. Sol sııaqty 100-den astam turǵyn zeınetaqy qoryn qurylysqa, qaıta jáne kúrdeli jóndeý jumystaryna jumsap otyr», - dedi J. Joltaeva.
