Zeınetaqy tóleý ortalyǵy 2015 jyldyń 9 aıynda 63 myńnan astam qyzmet kórsetti
ASTANA. QazAqparat - QR Densaýlyq saqtaý jáne áleýmettik damý mınıstrligi Zeınetaqy tóleý boıynsha memlekettik ortalyǵy 2015 jyldyń 9 aıynda 63 myńnan astam qyzmet kórsetti. Bul týraly búgin «Jańarý» jemqorlyqqa qarsy qozǵalysynyń qoǵamdyq tyńdaýynda ZTMO astanalyq fılıalynyń basshysy Oljabaı Beısenbaev málim etti.
Onyń aıtýynsha, jalpy osy jyly ortalyqtyń jumysyna qatysty xalyqtyń tarapynan 7 shaǵym túsken. Olardyń barlyǵy jedel túrde qaralyp, ózderiniń sheshimderin tapty.
«1 qazan jaǵdaıyndaǵy málimetter boıynsha, bizdiń ortalyq 63 myń 325 memlekettik qyzmet kórsetken. Memlekettik qyzmettiń kórsetilý merzimderine qatysty aryz-shaǵymdar bolmady», - deıdi ol «Nur Otan» partııasynyń elordalyq fılıalynda ótken jıynda.
Degenmen, xalyqtan birneshe shaǵym túsken. Olardyń deni qyzmet sapasyna baılanysty emes bolǵan.
«Osy merzim aralyǵynda 7 shaǵym tústi. Biraq olar kórsetilgen qyzmettiń sapasyna qatysty emes ekendigin aıta ketken jón. Máselen, jas ana balaǵa ótemaqy taǵaıyndaý jóninde ótinish jasaǵan. Alaıda onyń usynǵan kiris týraly anyqtamasy sáıkes kelmeı qaldy. Osy tektes shaǵymdar bolǵany ras, biraq olar der ýaqytynda sheshilip otyrdy», - dep atap ótti O. Beısenbaev.
Aıta ketý kerek, 2015 jyldyń 1 qazanyndaǵy derekter boıynsha, ZTMO Astana qalalyq fılıaly 226 124 adamǵa zeınetaqy men áleýmettik ótemaqy berip keledi.
Olardyń 66 786 zeınetaqy alýshylar bolsa, 21 185 myńy - otbasy asyraýshysynan aıyrylǵandar, múgedek jáne jasyna baılanysty memlekettik ótemaqy alýshylar.
