Zeınetaqy platformasy: Taǵy bir jańa fýnktsııa qosyldy

NUR-SULTAN. QazAqparat – Zeınetaqy jınaǵyn paıdalaný boıynsha onlaın-platformaǵa taǵy bir fýnktsııa qosyldy, dep habarlaıdy QazAqparat Otbasy bankiniń jelidegi paraqshasyna silteme jasap.

«Somany ózgertý kerek pe? - Ońaı! Qazir enpf-otbasy.kz onlaın-platformasyndaǵy jeke kabınetińizde málimdelgen zeınetaqy tóleminiń mólsherin azaıta alasyz. Muny tek ıpotekasyz satyp alý maqsatyn tańdaǵan kezinde jasaı alasyz jáne tek óz qarajatyńyz úshin, al jaqyn týystaryńyz tabystaǵan qarajat somasyn ózgertýge bolmaıdy», - delingen habarlamada.

Bank jańa fýnktsııanyń qalaı jumys isteıin bylaı túsindiredi. Mysaly Sizder BJZQ-dan belgili bir somaǵa tapsyrys berip, keıin arzanyraq páter taptyńyz.

Eger satyp alý-satý shartyna sáıkes satýshyǵa BZT esebinen tólenetin soma sizdiń arnaıy shotyńyzdaǵy qarajattan az bolsa, onda qujattardy (satyp alý-satý sharty jáne tirkelgen quqyqtar men aýyrtpalyqtar týraly anyqtama) júkteý kezinde siz «shart boıynsha soma» jolyna satyp alý-satý shartyndaǵy naqty somasyn jazyp, somany ózgerte alasyz.

Mysaly, sizdiń arnaıy shotyńyzda 7 mıllıon jáne týysyńyz tabystaǵan 5 mıllıon qarajat bar.

Páter 10 mıllıon turady. 4 mln siz satýshyǵa qolma-qol aqshamen tóledińiz, al 6 mln BZT esebinen tóleýdi josparlap otyrsyz jáne bul shartta jazylǵan.

Shart boıynsha soma bólimine 6 000 000 sanyn engizý jáne «somany ózgertý» batyrmasyn basý qajet.

Sizdiń arnaıy shotyńyzda 1 mln óz qarajatyńyz jáne 5 mln týysyńyz tabystaǵan qarajat qalady.

Mynalardy eskerý qajet:

Sharttyń búkil somasyn emes, satýshyǵa aýdarylatyn somany kórsetińiz.

Sizdiń arnaıy shotyńyzdaǵy qarajattan joǵary somany kórsetý múmkin emes

Týystar tabystaǵan qarajat somasyn ózgertýge bolmaıdy

Jańa múmkindik sizderge baspanany ıpotekasyz tolyq satyp alý kezinde naqty somany engizýge múmkindik beredi jáne eger ózińizdiń birjolǵy zeınetaqy tólemderińizdi ekinshi ret paıdalanýdy josparlaǵan bolsańyz, BJZQ-ǵa qarajatty qaıtarý úshin 45 kúndi kútpeýge kómektesedi.

Aıta ketsek, onlaın platforma únemi jańartylyp otyrady. Buǵan deıin atalǵan platformada páter satyp alý nemese zaımdy óteýge arnalǵan qujattardy júktegenge deıin bir rettik zeınetaqy tólemin alǵan soń oǵan týysyńyz bergen qarajatty qosý múmkindigi berilgen edi.

2021 jyly 2 qańtarda QR Prezıdenti Qasym-Jomart Toqaev zeınetaqy jınaǵynyń bir bóligin maqsatty paıdalanýǵa qatysty zańǵa qol qoıdy.

Qazaqstandyqtardyń zeınetaqy jınaqtaryn paıdalaný úshin jańartylǵan «jetkiliktilik shegi» jarııalandy. Zeınetaqy jınaǵynan alýǵa bolatyn soma BJZQ saıtynda avtomatty túrde kórsetiledi.

23 qańtardan Qazaqstanda zeınetaqynyń bir bóligin alýǵa ótinim qabyldaý bastaldy. Arnaıy portalda zeınetaqynyń bir bóligin alýǵa ótinim qabyldaý bastalǵaly úsh saǵattyń ishinde 4 myńnan astam adam ótinish berdi.