Zeınetaqy men jórgekpuldyń kóteriletini halyqtyń kóńilinen shyqty - Ermek Kelemseıit

«Ardagerler alqasynyń tóraǵasy bolǵannan keıin bizdi qýantyp turǵan máseleni aıtaıyn, ol - zeınetaqynyń eki kezeńde 20 paıyzǵa kóteriletini. Sodan keıin, bala týýyna baılanysty tólenetin bir rettik jórgekpuldyń da ósetini halyqty qýantty», -dedi Ermek Kelemseıit.

Sonymen qatar, ol óz sózinde Elbasy Joldaýyndaǵy 5 baǵyt boıynsha aımaqta alǵa mindetter qoıylyp otyrǵanyn aıtty.

«Joldaýda 5 baǵyt boıynsha kóptegen usynystar engizilip otyr, onyń barlyǵyn biz qoldaımyz. Búgin oblysta Joldaýǵa baılanysty talqylaý ótti. Aımaq ákimi Amandyq Batalov ólkede sheshilýi kerek máselelerge keńinen toqtaldy. Sonyń ishinde, densaýlyq saqtaý máselesinde Qoǵamdyq keńeste kóteriletin kóptegen suraqtar bar edi. Atap aıtqanda, dári-dármek baǵalarynyń qymbattap jatqany. 120 túrli dári-dármek baǵasyna oblysymyzda memorandým arqyly shekteý bolatyn. Elbasynyń Joldaýynda osy máseleni zańnama turǵysynda qolǵa alý tapsyrylǵan. Bul da halyqtyń kókeıinen shyǵady»,- dedi Almaty oblysy Ardagerler alqasynyń tóraǵasy. 

Ermek Kelemseıit jaqynda jarııalanǵan Elbasy Úndeýinen keıin atqarylatyn reformaǵa baılanysty memlekettik baǵdarlamalardyń oryndalýyna baqylaý kúsheıtilýi múmkin ekenin jetkizdi.

«Nurly jer» baǵdarlamasy aıasynda aldaǵy 15 jylda 1,5 mln halyqty baspanamen qamtamasyz etý týraly aıtyldy. Bul da halyqtyń kóńilinen shyǵyp jatyr. Jaqynda Elbasy bıliktiń ókiletti tarmaqtaryn zań shyǵarýshy jáne atqarýshy organdarǵa bólip berý máselesin aıtty, osydan keıin baǵdarlamalardyń oryndalýyna baqylaý kúsheıtiledi dep oılaımyn», - dedi Almaty oblystyq Ardagerler alqasynyń tóraǵasy, oblystyq máslıhattyń depýtaty, Qoǵamdyq keńes múshesi Ermek Kelemseıit.

Aıta keteıik, búgin Qazaqstan Respýblıkasynyń Prezıdenti Nursultan Nazarbaevtyń el halqyna Joldaýy jarııalandy.