Zeınetaqy qoryndaǵy qarajatty Úkimet tek bıýdjettiń tapshylyǵyna qaraı qoldanady - N.Nazarbaev
Áńgime barysynda jýrnalıster tarapynan zeınetaqy shottaryndaǵy jınaq qarajattar týraly suraq qoıylǵan bolatyn. Sonyń ishinde Biryńǵaı zeınetaqy qoryna jeke basqarýshylar keledi degen máselege Elbasy jaýap berdi. «Birinshiden, jurtshylyqqa kim zeınetaqy tólep jatyr? Memleket emes pe? Búgin úsh jolmen zeınetaqy tólenedi: jumys berýshi, memleket, salyq tóleýshi. Biz basqa elderdiń tájirıbelerin de aldyq. Zeınetaqy qorlary qaýipsiz jerde saqtalyp qana qoımaı, ol eselenip otyrýy kerek», - dedi N.Nazarbaev. Sonymen qatar Prezıdent ekinshi deńgeıli bankterge bul qarajat senip tapsyrylǵanyn, alaıda bankterdiń ózi daǵdarysqa tap bolǵanda, Qor qarajatyna da qaýip tóngenin aıtty. Ekinshiden, bankırler de halyqtyq qarajatty óz aktsıonerlerine nesıege bere bastaǵanyn aıtyp, buǵan eń aldymen memleket jaýapty ekenin jetkizdi. «Biz Ulttyq bankke osy zeınetaqy qarajatyn bergende osy qaýipterdi eske aldyq», - dedi Elbasy. «Meniń oıymsha, halyqqa alańdaýshylyqtyń qajeti joq: memlekettiń mindeti - zeınetaqy qarajatyn saqtaý. Ekinshiden, men zeınetaqy qorlaryndaǵy qarajatty barlyq kásiporyndarǵa birdeı jarata berýge bolmaıtynyn aıttym. Úkimet tek bıýdjettiń tapshylyǵy negizinde ony jumsaı alady. Óıtkeni memleket sol qarajatqa ózi jaýap beredi», - dedi Memleket basshysy.