Zeınetaqy qorlaryn biriktirý keler jyly aıaqtalady - Ulttyq bank tóraǵasy
ASTANA. 23 qazan. QazAqparat - Qazaqstandaǵy zeınetaqy qorlaryn biriktirý jumysy keler jyldyń ekinshi jartysyna taman aıaqtalady. Bul týraly Parlament Májilisiniń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zań jobasyna baılanysty baıandaǵan QR Ulttyq banki tóraǵasy Qaırat Kelimbetov málimdedi.
Sóz arasynda Qaırat Kelimbetov Úkimet pen Ulttyq bank Biryńǵaı jınaqtaýshy zeınetaqy qoryn qurýǵa qajetti normatıvtik-quqyqtyq bazany qalyptastyrý jumysyn aıaqtap kele jatqanyn jetkizdi. Onyń aıtýynsha, Biryńǵaı jınaqtaýshy zeınetaqy qorlaryna qoldanystaǵy jınaqtaýshy zeınetaqy qorlarynyń zeınetaqy aktıvterin ótkizý máselesi asa ózekti bolyp otyr. «Elimizdiń árbir azamatynyń jınaqtalǵan qorlary tolyǵymen saqtalýy kerek. Olardyń birde-bir teńgesi shashyramýy qajet. Qazirgi ýaqytta jınaqtaýshy zeınetaqy qorlarynan zeınetaqy aktıvteri men mindettemeleriniń ótkizý jáne qabyldaý kestesi bekitilip otyr. Jalpy, barlyq zeınetaqy qorlaryn biriktirý jumystary 2014 jyldyń 2-i jartyjyldyǵynda aıaqtalady dep kútilýde», - dedi UB tóraǵasy.
