Zeınetaqy qarjysyn shıpajaıda emdelýge paıdalaný máselesi talqylanýda - Lázzat Ibragımova

NUR-SULTAN. QazAqparat – Qazaqstandyqtar zeınetaqynyń bir bóligin shıpajaıdaǵy emge paıdalana ala ma? Tilshilerdiń bul suraǵyna Ortalyq kommýnıkatsııalar alańynda ótken baspasóz máslıhatynda «Otbasy bank» AQ tóraǵasy Lázzat Ibragımova jaýap berdi, dep habarlaıdy QazAqparat tilshisi.

«Erejeler qazir Ádilet mınıstrliginde bekitilgeli jatyr. Meniń bilýimshe, bul másele sońǵy satyda tur. Bizdiń sońǵy baspasóz máslıhatynda aıtqanymyzdy estigenin naqty bilemin. Segizinshi maqsat ta paıda boldy. Ol - qosymsha reprodýktıvti kómekshi tehnologııalar. Qazir EKO jasatýǵa bolady. Bul erejeniń sońǵy qujatta paıda bolǵanyn naqty bilemin» - dep túsindirdi bank basshysy.

Lázzat Ibragımova shıpajaıdaǵy em týraly sheshim áli qaralyp jatqanyn jetkizdi

«Bul baǵytta mende naqty aqparat joq. Birdeńe dep, salymshylardy shatastyrǵym kelmeıdi. Ol erejelerde baspanany alýdan bólek basqa da bıznes protsester qoljetimdi bolady», - dedi Lázzat Ibragımova.

Eske salsaq, 2021 jyly 2 qańtarda QR Prezıdenti Qasym-Jomart Toqaev zeınetaqy jınaǵynyń bir bóligin maqsatty paıdalanýǵa qatysty zańǵa qol qoıdy.

Qazaqstandyqtardyń zeınetaqy jınaqtaryn paıdalaný úshin jańartylǵan «jetkiliktilik shegi» jarııalandy. Zeınetaqy jınaǵynan alýǵa bolatyn soma BJZQ saıtynda avtomatty túrde kórsetiledi.

23 qańtardan Qazaqstanda zeınetaqynyń bir bóligin alýǵa ótinim qabyldaý bastaldy. Arnaıy portalda zeınetaqynyń bir bóligin alýǵa ótinim qabyldaý bastalǵaly úsh saǵattyń ishinde 4 myńnan astam adam ótinish berdi. Zeınetaqy qarjysyn emdelý úshin alý erejeleri jaqynda jarııalanady.