Zeınetaqy annýıteti sharty qandaı artyqshylyqtar beredi

NUR-SULTAN. QazAqparat – QR Qarjy naryǵyn retteý jáne damytý agenttigi Saqtandyrý naryǵy jáne aktýarlyq esep aıyrysýlar departamenti Saqtandyrý naryǵyn damytý basqarmasynyń basshysy Saǵı Ájibek zeınetaqy annýıteti shartynyń qandaı artyqshylyqtar beretinin túsindirdi, dep habarlaıdy QazAqparat tilshisi.

«Ekonomıkalyq ósimdi qalpyna keltirý máseleleri jónindegi zań aıasyndaǵy ózgeristerge sáıkes, BJZQ salymshylary zeınetaqy annýıteti sharty bolǵan jaǵdaıda turǵyn úı jaǵdaıyn jaqsartý jáne (nemese) em aqysyn tóleý nemese zeınetaqy aktıvterin ınvestıtsııalyq portfel basqarýshysyna senimgerlik basqarýǵa berý úshin BJZQ-ǵa mindetti zeınetaqy jarnalary jáne (nemese) mindetti kásiptik zeınetaqy jarnalary esebinen óz zeınetaqy jınaqtaryn QR zańnamasyna sáıkes jumsaı alady. Zeınetaqy annýıteti ónimderiniń jelisin keńeıtý maqsatynda bıyl zeınetaqy annýıteti shartyna bir adamnyń emes, erli-zaıyptylardyń (jaqyn týystardyń) qatysýyna múmkindik beretin birlesken annýıtetter engizý josparlanýda», - dedi Saǵı Ájibek OKQ brıfınginde.

Birlesken annýıtet erli-zaıyptylardyń (jaqyn týystardyń) zeınetaqy jınaqtaryn biriktirýge jáne annýıtet sharty boıynsha kiristerdi qaıta bólýge múmkindik beredi. Mysaly, bir adamda ÓSK (ómirdi saqtandyrý kompanııasy) annýıtetti satyp alý úshin zeınetaqy jınaqtary jetkiliksiz bolsa, al onyń jubaıynda artyǵymen bolsa, birlesken zeınetaqy annýıteti arqyly ekeýine de ómir boıy tólemder qamtamasyz etiledi.

Sonymen birge, S. Ájibek zeınetaqy annýıteti men zeınetaqy tólemderiniń negizgi aıyrmashylyqtaryn túsindirdi.

«Qoldanystaǵy zańnamaǵa sáıkes, azamattar zeınetaqy jasyna jetkende zeınetaqy tólemderin Biryńǵaı jınaqtaýshy zeınetaqy qorynan alýǵa quqyly nemese zeınetaqy jınaqtary jetkilikti bolǵan jaǵdaıda, ómirdi saqtandyrý kompanııasynan zeınetaqy annýıtetin satyp alý arqyly tólemder ala alady. Biryńǵaı jınaqtaýshy zeınetaqy qorynan tólemder zeınetaqy jınaqtary bitkenshe júzege asyrylady, al ómirdi saqtandyrý kompanııasynan tólemder aldyn-ala naqty belgilengen mólshermen ómir boıy júzege asyrylady. Sonymen birge, zeınetaqy annýıteti boıynsha tólemder er adamdar 55 jasqa, áıelder – 52 jasqa tolǵanda tólenedi», - deıdi S. Ájibek.

Onyń aıtýynsha, Ómirdi saqtandyrý kompanııasy zeınetaqy annýıteti tólemderin saqtanýshyǵa ómir boıy aı saıyn tóleıdi jáne jyl saıyn tólemderdi 5% paıyzdan kem emes kórsetkishke kóterip otyrady. Sonymen birge, zeınetaqy annýıteti shartynda kepildendirilgen tólem merzimin ornatýǵa bolady, bul optsııa saqtanýshy qaıtys bolǵan jaǵdaıda zeınetaqy annýıteti tólemderin muragerlerge berý múmkindigin qamtamasyz etedi.