Zeınetaqy aktıvterin basqarý: Shetel kompanııalaryna qandaı talaptar qoıylady

ASTANA. QazAqparat – Búgin Senatta zeınetaqy aktıvterin basqarýǵa reıtıngi joǵary sheteldik enshiles uıymdardy tartý usynysy talqylandy. Bul rette sheteldik kompanııalarǵa qatysty birqatar talaptar qoıylatyny aıtyldy, dep habarlaıdy QazAqparat tilshisi.

QR Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva qazirgi kezde qazaqstandyq basqarýshy kompanııalarda ınvestıtsııalyq portfeldi basqarýǵa lıtsenzııasy bolýy kerek ekenin aıtty. Sonymen qatar, olar kapıtal boıynsha qosymsha talaptardy oryndap, óz qyzmetterinde zań buzýǵa jol bermeýi tıis. Bul turǵyda olardyń qazaqstandyq rezıdent retinde iri aktsıoneri bolýy kerek.

«Atalǵan talap qaıta qaralatyn bolady. Zeınetaqy aktıvteriniń qomaqty kólemin basqaratyn, sondaı-aq Ulttyq qordyń aktıvterin basqaratyn belgili sheteldik basqarýshylar bar. Qazirgi kezde olar ózderin tıimdi basqarýshy retinde tanytyp otyr. Sondyqtan Qazaqstan aýmaǵynda aktıvter boıynsha sheteldik basqarýshylardyń múmkindigin keńeıtýdi usynyp otyrmyz», - dedi Senatta tilshiler suraǵyna jaýap bere otyryp.

Bul turǵyda M. Hadjıeva atalǵan basqarýshy kompanııalardy irikteý kezinde olardyń ınvestıtsııalyq ári kredıttik reıtıngileri basty nazarda bolatynyn naqtylady.

Budan buryn habarlanǵandaı, QR Ulttyq banki tóraǵasynyń orynbasary Álııa Moldabekova zeınetaqy aktıvteriniń bir bóligin jeke basqarýǵa berý kezinde qandaı ózgerister bolýy múmkin ekenin aıtty.

«Zeınetaqy aktıvteri turǵysynda tabystylyqty qamtamasyz etý úshin jeke basqarýshy kompanııalarǵa qoıylatyn talaptardy jaqsartý boıynsha shara qabyldaý kerek. Budan bólek, jekemenshik basqarýshy kompanııalardy zeınetaqy aktıvterin basqarýǵa jiberý krıterıılerin keńeıtý qajet. Onyń ishinde zeınetaqy aktıvterin basqarýǵa kredıttik reıtıngi joǵary sheteldik enshiles uıymdardy tartý múmkindigin qarastyrý usynyldy», - dedi UB ókili.