Zeınetaqy aktıvteri: Investıtsııalyq kiris byltyrǵy kórsetkishten asyp tústi

ASTANA. QazAqparat - Zeınetaqy aktıvteriniń ınvestıtsııalyq kirisi byltyrǵy kórsetkishten asyp tústi. 2023 jylǵy qańtarda eseptelgen zeınetaqy aktıvteriniń ınvestıtsııalyq kirisi sáıkes kezeńniń kórsetkishinen 5,4 esege artyp, 66,4 mlrd teńgege jetti. Bul týraly BJZQ baspasóz qyzmeti málim etti, dep habarlaıdy QazAqparat.

2023 jylǵy 1 aqpandaǵy jaǵdaı boıynsha QR Ulttyq bankiniń jáne ınvestıtsııalyq portfeldi basqarýshylardyń (IPB) quzyretindegi portfeldiń 12 aıdaǵy ınvestıtsııalyq kiristiligi tómendegideı boldy: QR UB - 6,93%, «Halyk Global Markets» AQ - 6,89%, «Jusan Invest» AQ - 6,44%, «BCC Invest» AQ - 4,93%, «Sentras Sekıýrıtız» AQ - 4,67%.

«Zeınetaqy aktıvteriniń az ýaqyt aralyǵyndaǵy kiristiligi olardy basqarý tıimdiliginiń kórsetkishi bola almaıdy. BJZQ-nyń zeınetaqy aktıvteri biraz ýaqytqa arnalǵan ınvestıtsııalyq is-qımyldarmen sıpattalady. Olardy ınvestıtsııalaýdyń negizgi maqsaty – uzaq merzimge arnalǵan kezeńde naqty kiris alý», - delingen BJZQ málimetinde.

Osy oraıda biraz ýaqyt boıy jınaqtalǵan ınvestıtsııalyq kiris ınflıatsııadan edáýir asyp túsetini aıtylyp otyr.

Árbir salymshy enpf.kz saıtyndaǵy «jeke kabınetinde» nemese uıaly qosymshada óziniń ınvestıtsııalyq tabysyn kóre alady.

BJZQ zeınetaqy aktıvterin ınvestıtsııalyq basqarýy týraly aqparat Qordyń (www.enpf.kz) resmı saıtyndaǵy «Kórsetkishter/Investıtsııalyq qyzmet» bóliminde jarııalanady.