Zeınetaqyny avtomatty túrde taǵaıyndaıtyn pılottyq joba toqtatyldy

ASTANA. KAZINFORM — Eńbek jáne halyqty áleýmettik qorǵaý mınıstrligi zeınetaqyny avtomatty túrde taǵaıyndaıtyn pılottyq jobanyń aıaqtalǵanyn habarlady.

— Zeınetaqy tólemin proaktıvti taǵaıyndaý boıynsha pılottyq joba boldy. Bastapqyda oǵan memlekettik korporatsııalar qatysty. Uıymdardyń kadr bólimi 1998 jylǵa deıingi eńbek ótili týraly aqparatty zeınetke shyǵýdy josparlaǵan qyzmetkerler úshin engizip otyrǵan. Keıin kvazımemlekettik sektor uıymdary da qosylyp, aqparat engizdi, — dedi Eńbek jáne halyqty áleýmettik qorǵaý vıtse-mınıstri Oljas Anafın ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, qazir pılottyq joba aıaqtaldy. 

— Pılottyq jobany odan ári qaraı keńeıtý máselesi ázirge belgisiz, sebebi barlyq jumys berýshi qyzmetkerleriniń aldyńǵy jumys ornyndaǵy, ásirese 1998 jylǵa deıingi eńbek ótili týraly aqparatty engizýge daıyn emes. Sondyqtan pılottyq joba ázirge toqtatyldy, basqa baǵytta jumys istep jatyrmyz. Naqty aıtqanda, E-arhıvti tsıfrlandyrýmen, e-arhıvpen ıntegratsııa júrgizemiz. Eńbek ótili týraly aqparat sol aqparattyq júıeden alynady, — dep túsindirdi mınıstrdiń orynbasary.

Bıyl jazda zeınetaqy rásimdeý protsesin tsıfrlandyrý boıynsha pılottyq joba engizilgen edi.