Zeınetaqy júıesiniń taǵy bir modeli pysyqtalyp jatyr – Eńbek mınıstri
ASTANA. KAZINFORM – Eńbek jáne halyqty áleýmettik qorǵaý mınıstri Asqarbek Ertaev zeınetaqy júıesinde reformany talqylaý aıasynda taǵy bir model – sıngapýrlyq model talqylanyp jatqanyn aıtty.
- Áli talqylaý júrgizip jatyrmyz. Óıtkeni taıaýda qosymsha usynys – sıngapýrlyq zeınetaqy júıesiniń modeli paıda boldy. Kelesi aptada dál osy modeldi talqyǵa salamyz. Sıngapýrlyq júıe jınaqtaýdy kózdeıdi. Mindetti túrde jınaqtaý kerek. Degenmen, baspana satyp alýǵa múmkindik bar, - dedi Asqarbek Ertaev Parlament palatalarynyń birlesken otyrysy aıasynda.
Onyń aıtýynsha, mınıstrlik búginde sarapshylardyń qorytyndysyn kútip otyr. Qorytyndy alynǵannan keıin bul usynys jumys tobynyń qaraýyna shyǵarylady.
- Qalaı degende de biz osy usynystardyń ishinen ońtaılysyn tańdap, odan zeınetaqy júıemiz qalaı damıtyndyǵyna qatysty qorytyndy toptama jasaımyz, - dedi mınıstr.
Buǵan deıin Eńbek jáne halyqty áleýmettik qorǵaý mınıstrligi basqa vedomstvolarmen birlesip, zeınetaqy júıesin reformalaýdyń eki modelin qarastyryp jatqanyn jazǵan edik.
Usynylyp otyrǵan nusqalardyń biri – «4+1» modeli. Bul model boıynsha jumys berýshiniń qosymsha mindetti zeınetaqy jarnalarynyń 4 paıyzy qyzmetkerdiń jeke jınaqtaýshy zeınetaqy shotyna, al 1 paıyzy ortaq saqtandyrý qoryna aýdarylady.
Al Memlekettik áleýmettik saqtandyrý qory balama nusqa usynyp otyr. Bul jaǵdaıda barlyq qosymsha jarna ortaq qorǵa jınaqtalyp, keıinnen tólem alýǵa quqyǵy bar azamattar arasynda bólinedi.
