Zeınetaqy júıesin reformalaýdyń tujyrymdamalyq tásilderi ázirlenedi — UB
ASTANA. KAZINFORM — Ulttyq bank Biryńǵaı jınaqtaýshy zeınetaqy qorynyń ınvestıtsııalyq strategııasyn jetildiredi. Bul týraly Senattyń jalpy otyrysynda Ulttyq bank tóraǵasy Tımýr Súleımenov aıtty.
— Zeınetaqy jınaqtarynyń joǵary kiristiligin qamtamasyz etý úshin Ulttyq bank Biryńǵaı jınaqtaýshy zeınetaqy qorynyń ınvestıtsııalyq strategııasyn jetildiredi, ıaǵnı aktsııalar men balamaly quraldar sııaqty kiristiligi joǵary aktıvterdiń úlesin ulǵaıtamyz, — dedi Tımýr Súleımenov Úkimettiń ótken jylǵy respýblıkalyq bıýdjettiń atqarylýy týraly esebin talqylaý barysynda.
Ulttyq bank tóraǵasynyń aıtýynsha, osyǵan baılanysty maýsymda jańa balamaly quraldar portfeli quryldy. 500 mln dollar somasyna birinshi transh júrgizildi.
— Zeınetaqy aktıvterin jeke basqarý ınstıtýtyn damytý jumysy jalǵasady. Bul olardyń kiristiligin arttyrýǵa septigin tıgizip, baǵaly qaǵazdar naryǵyn damytýǵa oń áser etedi. Sonymen qatar, Úkimetpen birge zeınetaqy júıesin reformalaýdyń tujyrymdamalyq tásilderi ázirlenedi, — dedi ol.
Aıta keteıik, 2025 jyly elimizdiń altyn-valıýta rezervteri 42,8 paıyzǵa óskenin jazǵanbyz.
