Zeınetaqy júıesin reformalaýdyń qandaı modeli qabyldanady - mınıstr jaýaby
ASTANA. KAZINFORM – Eńbek jáne halyqty áleýmettik qorǵaý mınıstrligi basqa vedomstvolarmen birlesip, zeınetaqy júıesin reformalaýdyń eki modelin qarastyryp jatyr. Bul máselege qatysty ortaq ustanym Úkimetke shilde aıynyń basynda usynylmaq.
Eńbek jáne halyqty áleýmettik qorǵaý mınıstri Asqarbek Ertaevtyń aıtýynsha, jumys toby maýsym aıynyń sońyna deıin Ulttyq bankpen jáne Qarjy naryǵyn retteý jáne damytý agenttigimen birlesip, Úkimetke eki modeldiń qaısysyn usynatynyn anyqtaýy tıis.
Usynylyp otyrǵan nusqalardyń biri – «4+1» modeli. Bul model boıynsha jumys berýshiniń qosymsha mindetti zeınetaqy jarnalarynyń 4 paıyzy qyzmetkerdiń jeke jınaqtaýshy zeınetaqy shotyna, al 1 paıyzy ortaq saqtandyrý qoryna aýdarylady.
Al Memlekettik áleýmettik saqtandyrý qory balama nusqa usynyp otyr. Bul jaǵdaıda barlyq qosymsha jarna ortaq qorǵa jınaqtalyp, keıinnen tólem alýǵa quqyǵy bar azamattar arasynda bólinedi.
- Bul talqylaýlar áli de jalǵasyp, jumys toby jumys istep jatyr. Osy aıdyń sońyna deıin qaı jobany tańdaıtynymyzdy naqtylaýymyz qajet. Al shilde aıynyń basynda Ulttyq bankpen, Qarjy naryǵyn retteý jáne damytý agenttigimen birlesken ortaq ustanymdy Úkimetke engizemiz, — dedi mınıstr Senattyń jalpy otyrysynan keıin.
Ol qazirgi ýaqytta jumys berýshiler mindetti zeınetaqy jarnalaryn 3,5 paıyz mólsherlememen aýdaryp jatqanyn eske saldy. Bolashaqta bul kórsetkish kezeń-kezeńimen 5 paıyzǵa deıin ulǵaıtylýy tıis.
Osy rette mınıstr bul máselege qatysty óziniń jeke pikirin de bildirdi.
— Ártúrli kózqaras bar. Jeke ózim «4+1» modelin qoldaımyn. Sebebi bul joba durys ári tıimdi kórinedi. Sonymen qatar saqtandyrý zeınetaqysyn da qoldaımyn. Sondyqtan aı sońyna deıin talqylaý jalǵasady. Kelesi aıdyń basynda qaı nusqany tańdaǵanymdy jáne onyń artyqshylyqtaryn túsindire alamyn, — dedi ol.
Mınıstrdiń aıtýynsha, 2026 jyldyń sońyna deıin reformanyń naqty modelin tańdap qana qoımaı, qajetti zańnamalyq túzetýlerdi de ázirleý josparlanyp otyr. Alaıda, ózgeristerdi engizý merzimi ázirge naqtylanbaǵan.
— Bul másele áli talqylanady. Zeınetaqy reformasy kelesi jyldan bastap engizile me, álde eki jyldan keıin júzege asa ma — bul suraq ázirge ashyq kúıinde qalyp otyr. Bul jóninde naqty sheshim qabyldanǵan joq, — dep atap ótti Asqarbek Ertaev.
Buǵan deıin zeınetaqy júıesin reformalaýdyń tujyrymdamalyq tásilderi ázirlenetinin jazǵan edik.
