Zeınetaqy júıesin depozıt retinde qarastyrýǵa bolmaıdy — Ulttyq bank tóraǵasy
ASTANA. KAZINFORM — Ulttyq bank tóraǵasy Tımýr Súleımenov zeınetaqy jınaǵynyń eń tómengi jetkilikti sheginiń kóterilýine qatysty pikir aıtty.
— Zeınetaqy jınaǵy birinshi kezekti jastarǵa, jumys isteýge qaýqyrly adamdarǵa zeınetke shyqqanǵa deıin qarajat jınaýǵa arnalǵan. Sebebi zeınetke shyqqan kezde, adamdarda basqa tabys kózi bolmaýy múmkin. Sondyqtan zeınetaqy jınaǵy osy máseleni eskere otyryp jasaqtalyp otyr. Zeınetaqy júıesin depozıt retinde qarastyrýǵa bolmaıdy. Zeınetaqy shoty — ol kez kelgen adamdy zeınetaqy tólemderimen qamtamasyz etý tetigi, bolashaq zeınetaqysyn qorǵaýǵa baǵyttalǵan. Atap aıtqanda, bul júıe ne úshin qurylǵanyn umytpaý kerek, — dedi T. Súleımenov Parlament Májilisiniń jalpy otyrysynan keıin tilshiler suraǵyna jaýap bere otyryp.
Osy oraıda ol elimizde birneshe jyldan beri zeınetaqy jınaqtaryn merziminen buryn paıdalaný múmkindigi berilgenin eske saldy.
— 2021 jyly osy ıdeıa usynylǵan kezde, bul másele eki faktorǵa baılanysty júzege asty. Birinshiden, halyq koronavırýs indetinen keıingi qıyn jaǵdaıdan shyǵýy úshin tıisti yntalandyrý tetigi kerek boldy. Bul rette turǵyn úı jaǵdaıyn jaqsartý, ekonomıkalyq belsendikti qalpyna keltirý baǵyttary nazarǵa alyndy, — dedi Ulttyq bank basshysy.
Aıta keteıik, jaqynda BJZQ esepteýdiń jańartylǵan ádistemesin eskere otyryp, zeınetaqy jınaqtarynyń 2026 jylǵy eń tómengi jetkilikti shegin jarııalady.
