Zeınetaqy júıesi ózgere me: sarapshylar jańa tetikterdi talqylady
ASTANA. KAZINFORM- Almatyda Qazaqstannyń zeınetaqy júıesin odan ári damytý máselelerine arnalǵan kezdesý ótti. Qatysýshylar bolashaq zeınetaqy tólemderiniń jetkilikti deńgeıin qamtamasyz etý, azamattardyń zeınetaqy quqyqtaryn nyǵaıtý jáne júıeniń uzaq merzimdi qarjylyq turaqtylyǵyn saqtaý tetikterin talqylady.
QR Eńbek jáne halyqty áleýmettik qorǵaý mınıstrligi baspasóz qyzmetiniń hbarlaýynsha, kezdesý Memleket basshysynyń osy baǵyttaǵy tapsyrmalaryn oryndaý aıasynda uıymdastyryldy.
Jıynǵa QR Eńbek jáne halyqty áleýmettik qorǵaý mınıstri Asqarbek Ertaev, «Biryńǵaı jınaqtaýshy zeınetaqy qory» AQ basqarma tóraǵasy Janat Qurmanov, sondaı-aq qarjy sektorynyń sarapshylary Bolat Jámishev pen Elena Bahmýtova qatysty.
Zeınetaqy júıesiniń qarjylyq turaqtylyǵyn nyǵaıtý, onyń uzaq merzimdi teńgerimdiligin qamtamasyz etý jáne tólemderdiń laıyqty deńgeıin saqtaý jónindegi tapsyrmalardy oryndaý úshin Eńbek jáne halyqty áleýmettik qorǵaý mınıstriniń tóraǵalyǵymen vedomstvoaralyq jumys toby quryldy.
Kezdesýde azamattardyń zeınetaqy quqyqtaryn nyǵaıtýǵa, halyqty zeınetaqy júıesimen qamtýdy keńeıtýge jáne eńbek qyzmeti kezeńinde zeınetaqy jınaqtaryn molaıtýǵa múmkindik beretin tásilder qarastyryldy.
Talqylaý barysynda azamattyń bolashaq zeınetaqysyn qalyptastyrý kezinde onyń barlyq quramdas bóligin, atap aıtqanda, memlekettik tólemder men eńbek qyzmeti kezeńinde jınaqtalatyn qarajatty eskerý máselesine erekshe nazar aýdaryldy. Qyzmetker men jumys berýshiniń turaqty jarnalary esebinen zeınetaqy jınaqtaryn arttyrýǵa jáne halyqty zeınetaqy júıesimen qamtýdy keńeıtýge yqpal etetin tetikter qarastyrylyp jatyr.
Usynystar ázirleý kezinde zeınetaqy júıesiniń damýyna uzaq merzimdi perspektıvada áser etetin negizgi faktorlar eskeriledi. Olardyń qatarynda demografııalyq ózgerister, ómir súrý uzaqtyǵynyń artýy, eńbek naryǵyndaǵy ózgerister jáne halyqaralyq tájirıbe bar. Mundaı tásil zeınetaqy júıesiniń damý barysyn búgingi kórsetkishter turǵysynan ǵana emes, bolashaq urpaqtyń qajettilikterin eskere otyryp baǵalaýǵa múmkindik beredi.
Jumystyń jeke baǵyty aktýarlyq esepteýler men boljamdy baǵalaýǵa arnalǵan. Bul esepteýler usynylyp otyrǵan sheshimderdiń bolashaq zeınetaqy tólemderiniń deńgeıine, azamattardyń zeınetaqy quqyqtaryna jáne júıeniń uzaq merzimdi qarjylyq turaqtylyǵyna yqtımal áserin aldyn ala baǵalaýǵa múmkindik beredi.
Kezdesý barysynda «BJZQ» AQ basqarma tóraǵasy Janat Qurmanov qatysýshylardy quttyqtap, Qazaqstannyń qoldanystaǵy zeınetaqy júıesiniń negizgi qaǵıdattary men zeınetaqy jınaqtaryn qalyptastyrý tásilderin tanystyrdy.
-Búginde zeınetaqy júıesin odan ári damytýdyń múmkindikterin jan-jaqty baǵalaý úshin sarapshylardyń bilimi men praktıkalyq tájirıbesin biriktirý mańyzdy. BJZQ memlekettik organdarmen jáne sarapshylar qaýymdastyǵymen birlesip, osy baǵyttaǵy jumysty jalǵastyrýǵa daıyn, – dep atap ótti Janat Qurmanov.
-Bizdiń mindetimiz – zeınetaqy júıesiniń turaqtylyǵyn qamtamasyz etip qana qoımaı, azamattardyń bolashaqta laıyqty zeınetaqymen qamtylýyna múmkindik beretin tásilderdi ázirleý. Sondyqtan usynylatyn árbir sheshim qazirgi jáne bolashaq urpaqtyń múddelerin eskere otyryp, jan-jaqty baǵalanýy tıis, – dedi Asqarbek Ertaev.
Zeınetaqy júıesin jetildirý jumystary QR Eńbek jáne halyqty áleýmettik qorǵaý mınıstrligi, Biryńǵaı jınaqtaýshy zeınetaqy qory, Memlekettik áleýmettik saqtandyrý qory jáne sarapshylar qaýymdastyǵynyń birlesýimen jalǵasady.
Jumys qorytyndysy boıynsha azamattardyń zeınetaqy quqyqtaryn nyǵaıtýǵa, júıeniń turaqtylyǵyn arttyrýǵa jáne eńbek qyzmetiniń búkil kezeńinde jetkilikti zeınetaqymen qamtylýyna jaǵdaı jasaýǵa baǵyttalǵan teńgerimdi usynystar ázirlenedi.
Osyǵan deıin Qazaqstanda zeınetaqy annýıteti boıynsha tólemder 81,5 mlrd teńgege jetkeni týraly jazdyq.
