Zeınetaqy júıesi: Qazaqstan Sıngapýr, Gonkong jáne Qytaıdy basyp ozdy

ASTANA. KAZINFORM — ​​Allianz halyqaralyq reıtıngindegi Qazaqstandyq zeınetaqy júıesiniń orny joǵarylady. Bul týraly BJZQ baspasóz qyzmeti habarlady. 

— Allianz kompanııasy jańartylǵan Jahandyq zeınetaqy esebin jarııalap, onda Qazaqstan 71 eldiń ishinde 26-oryndy ıelendi. Bul 2023 jylǵy kórsetkishpen salystyrǵanda (34-oryn, 75 eldiń ishinde) aıtarlyqtaı jaqsarý bolyp tabylady. Qazaqstan Avstrııa, Ispanııa, Chılı, Sıngapýr, Gonkong jáne Qytaıdy basyp ozdy, — delingen habarlamada.

Allianz zeınetaqy ındeksi (API) reıtıngi zeınetaqy júıeleriniń tutastyǵymen men jetkiliktiligin úsh sýb-ındeks boıynsha baǵalaıdy. Qazaqstannyń jalpy kórsetkishi — 3,5 ball:

Demografııalyq ózgerister, memlekettik qaryz jáne ómir súrý deńgeıi — 4,1 ball (2023 jyly — 3,5).
Zeınetaqy júıesiniń turaqtylyǵy — 3,6 ball (ózgerissiz).
Zeınetaqy júıesiniń jetkiliktiligi — 3,2 ball (2023 jyly — 3,3).

Barlyq el boıynsha ortasha kórsetkish 3,7 balldy qurady. Reıtıngtiń kóshbasshysy Danııa bolyp qala beredi (2,3 ball), odan keıin Nıderlandy men Shvetsııa (2,6 ball), Japonııa (2,7 ball), Jańa Zelandııa (2,8 ball), Izraıl (3 ball).

Reıtıngtiń sońǵy oryndarynda Marokko, Úndistan, Laos, Malaızııa jáne Shrı-Lanka ornalasqan (4,5-5 ball aralyǵynda). Bul elderde zeınetaqy júıesimen qamtylý deńgeıi tómen, sebebi beıresmı jumyspen qamtý joǵary úleske ıe.

— Baıandamada halyqtyń qartaıý máselesine erekshe nazar aýdarylady: BUU boljamyna sáıkes, 2050 jylǵa qaraı 65 jastan asqan adamdardyń sany eki ese ósip, 857 mıllıonnan 1,578 mıllıardqa jetedi. Demografııalyq júkteme koeffıtsıenti 16-dan 26 adamǵa deıin artady (100 eńbekke jaramdy azamatqa shaqqanda). Halyq qartaıýynyń eń joǵary qarqyny Gonkong, Ońtústik Koreıa, Taıvan jáne Saýd Arabııasynda baıqalady, — delingen BJZQ habarlamasynda.

Sarapshylar zeınetaqy júıesiniń turaqtylyǵyn qamtamasyz etý úshin jınaqtaýshy komponentti damytý qajet ekenin atap ótedi. Memlekettik bólý jáne jeke jınaqtaýshy júıelerdi úılestiretin teńgerimdi model demografııalyq ózgeristerdiń áserin azaıtýǵa múmkindik beredi.

Zeınetaqynyń ortasha kiristi almastyrý koeffıtsıenti (KAK) zerttelgen elder boıynsha 53%, al Qazaqstanda — 41%.

Allianz esebi zeınetaqy júıesin turaqtylyq pen jetkiliktilik arasyndaǵy tepe-teńdikti saqtaı otyryp reformalaý, jınaqtaýshy tetikterdi damytý jáne eńbek naryqtaryn demografııalyq ózgeristerge beıimdeý qajettigin erekshe atap kórsetedi.

Aıta ketelik BJZQ aqshasy qalaı basqarylyp otyrǵany týraly jazǵan edik.