Zeınetaqy jınaqtarynyń jetkiliktilik shegi kóterilýine baılanysty turǵyn úı qymbattaı ma
ASTANA. KAZINFORM — Zeınetaqy jınaqtarynyń jetkiliktilik shegi kóterilýi turǵyn úı baǵasyna áser etken joq. Bul jóninde QR Ónerkásip jáne qurylys mınıstri Ersaıyn Naǵaspaev Úkimet otyrysynan keıingi brıfıngte málimdedi.
Onyń aıtýynsha, Qazaqstandaǵy kommertsııalyq turǵyn úı baǵasyn memleket rettemeıdi. Al elimizde kommertsııalyq turǵyn úıdiń bir sharshy metriniń ortasha quny — shamamen 617 myń teńge.
— Áleýmettik turǵyn úı baǵasyna kelsek, memlekettiń ustanymy aıqyn — biz baǵany baqylaýda ustaımyz, ol qymbattamaıdy, — dedi Ersaıyn Naǵaspaev Úkimettegi brıfıng barysynda.
Mınıstr jyljymaıtyn múlik baǵasy memlekettiń aralasýynsyz, suranys pen usynysqa baılanysty qalyptasatynyn túsindirdi.
— Baǵanyń ósýi nemese tómendeýi jóninde boljam jasaǵym kelmeıdi, alaıda qazir oǵan negiz bolatyn sebepter joq. Jyldyń alǵashqy aılarynda turǵyn úı naryǵyndaǵy belsendiliktiń tómendegenin baıqasaq, jaz mezgilinde, ádette, turǵyn úıge suranys artady, — dedi Ersaıyn Naǵaspaev.
Mınıstr jýrnalısterdiń «Jetkiliktilik sheginiń kóterilýi turǵyn úı naryǵynda baǵa qalyptastyrýǵa áser etti me?» degen suraǵyna «Joq» dep jaýap berdi.
Aıta keteıik, buǵan deıin «Umaı» áıelder ıpotekasy tamyz aıynda qaıta iske qosylatynyn jazǵanbyz.
