Zeınetaqy jınaqtarynyń jetkiliktilik shegi qalaı ózgeredi
ASTANA. KAZINFORM — Qazaqstanda eń tómengi jetkiliktilik shegin (TJSh) esepteýdiń jańa ádistemesi engizilýi múmkin. Bul ózgeris bolashaqta azamattardyń jınaqtaýshy zeınetaqysyn ulǵaıtyp, turaqty tólem deńgeıin qamtamasyz etýge baǵyttalǵan. Bul týraly «BJZQ» AQ baspasóz qyzmeti málimdedi.
Qordyń túsindirýinshe, qazirgi TJSh ádistemesiniń birneshe álsiz tusy bar. Atap aıtqanda, ol uzaqmerzimdi makroekonomıkalyq boljamdarǵa táýeldi jáne bolashaqta mindetti zeınetaqy jarnalarynyń turaqty aýdarylatynyna kepildik bermeıdi. Sonyń saldarynan búgingi jetkiliktilik shegi bolashaq zeınetaqynyń jetkilikti bolýyn tolyq qamtamasyz ete almaıdy.
Qoldanystaǵy júıe boıynsha azamat TJSh-dan asatyn qarajatyn paıdalanǵannan keıin de zeınetaqy jarnalaryn turaqty tóleıdi dep esepteledi. Alaıda is júzinde jarnalardyń ýaqytyly aýdarylmaýy nemese múlde toqtaýy múmkin.
Jańa ádisteme osy táýekelderdi azaıtýǵa baǵyttalǵan. Usynylǵan tásilge sáıkes, TJSh-dan joǵary somany alǵannan keıin azamattyń bolashaq jınaqtaýshy zeınetaqy mólsheri medıandy jalaqynyń keminde 40%-y deńgeıine jýyqtaıdy. Qazir medıandy jalaqy kólemi 339 912 teńge.
Sonymen qatar jańa júıede TJSh mólsheri kóptegen makroekonomıkalyq kórsetkishterdiń jyl saıynǵy ózgerisine táýeldi bolmaıdy. Ol halyqtyń demografııalyq derekteri men uzaqmerzimdi faktorlar negizinde eseptelmek.
BJZQ málimetinshe, TJSh kólemi burynǵydaı azamattyń jasyna baılanysty anyqtalady: zeınetkerlik jasqa jaqyndaǵan saıyn jetkiliktilik shegi de joǵary bolady.
Qor ókilderi bul ózgerister halyqaralyq standarttarǵa jaqyndaýǵa jáne azamattardyń zeınetke shyqqan kezdegi tabysynyń jetkilikti bolýyn qamtamasyz etýge múmkindik beretinin atap ótti.
Sondaı-aq zeınetaqy jınaqtarynyń bir bóligin merziminen buryn paıdalaný múmkindigi saqtalady. Biraq qarajatty alý talaptary bolashaqtaǵy turaqty zeınetaqy tólemderin eskere otyryp qaıta qaralady.
Osyǵan deıin Tımýr Súleımenov BJZQ-dan qarajat alý sheginiń tásilderin qatańdatý qajet ekenin aıtty.
