Zeınetaqy jınaǵynyń jetkilikti shegi: BJZQ taıaýda jańa mejeni jarııalaıdy
ASTANA. KAZINFORM — Eńbek jáne halyqty áleýmettik qorǵaý mınıstri Asqarbek Ertaev eldegi BJZQ jınaǵynyń jetkilikti shegi boıynsha engizilgen ózgeriske qatysty túsinik berdi.
- Eńbek mınıstrligi óz quzyreti sheginde erejelerge túzetýler engizýmen aınalysty. Qoldanystaǵy formýla 9 kórsetkishten — eń tómengi jalaqydan, eń tómengi zeınetaqydan jáne basqa da kórsetkishten turdy. Jańa formýla 5 kórsetkishten turady. Onda 9% jyldyq tabystylyq mólsherlemesi, aı saıynǵy tólemder boıynsha jyldyq ındeksteý mólsherlemesi jáne óz de kórsetkishter qamtyldy. Endi erejege engizilgen ózgeriske sáıkes, zańnama aıasynda BJZQ 10 kún ishinde 20-dan 63 jasqa deıingilerdi qamtıtyn jáne árbir jasqa arnalǵan tıisti jetkiliktilik shegin anyqtaıtyn esep-qısapty usynady. Bul esepteýlerdi atalǵan qor iske asyryp jatyr. Bizge bul esepteýler áli usynylmady, - dedi A. Ertaev Úkimet otyrysynan keıingi baspasóz máslıhatynda.
Sonymen qatar mınıstr BJZQ-daǵy jınaqty em-domǵa jumsaý tetigi saqtalatynyn aıtty.
- Bul múmkindik saqtalady, ıaǵnı jańa shekti mánder engizilse de, eger azamattyń artyq jınaǵy bolsa, ony nesıege nemese emdelýge paıdalana alady. Biz bul jaǵyn qozǵaǵan joqpyz, - dedi vedomstvo basshysy.
Buǵan deıin habarlanǵandaı, QR Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev zeınetaqy jınaǵynyń eń tómen jetkilikti shegin aıqyndaý ádistemesine ózgerister engizýge qatysty túsinik berdi.
Jaqynda Qazaqstan Úkimeti zeınetaqy jınaqtarynyń eń tómengi jetkilikti shegin esepteýdiń jańa tártibin bekitti. Tıisti qaýlyǵa Premer-mınıstr Oljas Bektenov qol qoıdy.
