Zeınetaqy jınaǵynyń eń tómengi jetkilikti shegi nege joǵarylady
ASTANA. KAZINFORM — Kazinform agenttiginiń BIZDIÑ ORTA podkastynda Biryńǵaı jınaqtaýshy zeınetaqy qorynyń basqarýshy dırektory Murat Sháripov zeınetaqy jınaǵyn merziminen buryn paıdalaný jáne onyń eń tómengi jetkilikti shegi jóninde pikir bildirdi.
— Zeınetaqy jınaqtaryn qoldanamyz dep, bolashaqta, zeınetkerlik jasqa kelgen kezde laıyqty zeınetaqyny qamtamasyz etpeı, qazir bárin jumsap tastaý durys emes. Buǵan deıin osy múmkindikti paıdalana otyryp, biraz azamat turǵyn úı jaǵdaıyn jaqsartty, densaýlyǵyndaǵy syrqattardy emdedi. Árıne, ár azamat óziniń tańdaǵan maqsatyna qoldandy. Qatelesip, durys qoldanbaǵan adamdardyń suraqtary da týyndap jatyr. Ol — ár azamattyń óziniń jaýapkershiligi, — dedi ol.
Sonymen birge, BJZQ basshysy zeınetaqy jınaǵynyń eń tómengi jetkilikti shegi ne sebepti kóterilgenin túsindirdi.
— Eń tómengi jetkilikti shek azamattarǵa bolashaqta laıyqty zeınetaqy qamtamasyz etý maqsatynda qaıta qaraldy. Búkil dúnıe júzindegi zeınetaqy júıesiniń talaby, maqsaty — bir. Ol eńbek joly aıaqtalyp, zeınetkerlik jasyna tolǵan kezde azamattardyń ary qaraıǵy ómirin qamtamasyz etý kerek. Ózderińiz bilesizder, dúnıe júzinde de, Qazaqstanda da zeınetke tolǵannan keıingi ómir súrý uzaqtyǵy ósip kele jatyr. Búginde azamattarymyzdyń ortasha ómir súrý uzaqtyǵy 76 jastan asty. Bul kórsetkish sońǵy 30 jylda 8,5 jyldan astam deńgeıge joǵarylady. Sondyqtan bolashaqta laıyqty zeınetaqyny qamtamasyz etý — ár azamattyń da, memlekettiń de maqsaty. Osyǵaı oraı, Biryńǵaı zeınetaqy jınaqtaýshy qory jańa qabyldanǵan ádisteme boıynsha, jańa eń tómengi jetkilikti shektiń somasyn sanap, jarııalady, — dedi ol.
Aıta keteıik, buǵan deıin zeınetaqy jınaǵynyń 2026 jylǵy eń tómengi jetkilikti shegi jarııalanǵanyn jazǵanbyz.
