Zeınetaqy jınaǵynyń eń tómen jetkilikti shegi qashan ózgeredi

ASTANA. KAZINFORM – Eńbek jáne halyqty áleýmettik qorǵaý mınıstri Asqarbek Ertaev zeınetaqy jınaǵynyń eń tómen jetkilikti shegin aıqyndaý ádistemesine ózgerister engizýge qatysty túsinik berdi.

Búgin Úkimet otyrysynan keıingi baspasóz máslıhatynda zeınetaqy qoryndaǵy qarajatty merziminen buryn paıdalanýǵa múmkindik beretin jetkiliktik shegi qanshalyqty ózgerýi múmkin ekeni suraldy. «Bul tártip zeınetaqy júıesinen qarajat alýdy qıyndatyp jibermeı me?» dep surady tilshiler.

- Osy aıdan bastap bul suraqty kún tártibine engizdik. Jalpy, osy jetkiliktik shegin kóterý jónindegi usynysty jasadyq. Bul turǵyda biraz talqylaý boldy, ıaǵnı ınflıatsııa deńgeıinde 10 paıyzǵa kóterýge qatysty pikir boldy. Qazir ol ádistemege tıisti ózgeris engizý úshin usynystardy ókiletti organdarǵa joldadyq. Óz kezeginde olar ózderiniń usynystaryn da jarııalaıdy. Osynyń bárin jınaqtap, pysyqtaımyz. Sondyqtan keler aıdyń aıaǵyna deıin ózgeris engizý josparyn belgiledik, - dedi A.Ertaev.

Onyń aıtýynsha, bul jumystardyń negizgi maqsaty – ár adamnyń zeınetke shyqqan kezdegi tabysyn kóterý.

- Keıingi 5 jylǵa taldaý jasadyq. El halqy 5 trln teńgeni zeınetaqy qorynan sheship aldy. Al eger taǵy 5 jylda osynshama qarajatty alsa, zeınetaqy qory durys jumys isteı almaıdy, qarajat jınaqtalmaıdy. Sondyqtan adamdar óziniń bolashaǵyn oılaýy kerek, - dedi mınıstr.

Budan buryn habarlanǵandaı, zeınetaqy jınaǵynyń eń tómen jetkilikti shegi qaıta qaralatyny málim boldy.