Zeınetaqy jınaǵynan aqsha alýdy shekteıtin jańa tyıym engizildi

ASTANA. KAZINFORM — Otbasy bank birjolǵy zeınetaqy tólemderi esebinen oftalmologııalyq qyzmetterdi tóleýge arnalǵan ótinimderdi enpf-otbasy.kz platformasy 4 jeltoqsannan bastap qabyldamaıdy. Bul týraly banktiń baspasóz qyzmeti habarlady. 

Osy kúnge deıin jiberilgen barlyq ótinim qabyldanyp, belgilengen tártippen qaralady.

— Ótinim qabyldaýdy toqtatý Densaýlyq saqtaý mınıstrliginiń BJZQ emdelýge paıdalaný erejelerine engizgen ózgeristerimen baılanysty. Jeltoqsannyń úshi kúni tıisti buıryq jarııalandy. Jańa erejelerge sáıkes, zeınetaqy qarajatyn stomatologııaǵa da, oftalmologııaǵa da paıdalanýǵa ruqsat berilmeıdi, — delingen habarlamada.

Qazirgi ýaqytta bankte «oftalmologııa» baǵyty boıynsha jalpy somasy 13,3 mlrd teńge bolatyn 15 808 ótinim bar. Onyń ishinde:

• 5131 ótinim (4,6 mlrd teńge) boıynsha bank mamandary qujattardy tekserip jatyr;
• 10 677 ótinim (8,7 mlrd teńge) boıynsha klıentterden qosymsha qujat suralyp jatyr.

— Stomatologııa boıynsha ótinimder toqtatylǵannan keıin oftalmologııaǵa suranys kúrt artty. 15 qyrkúıekke deıin aıyna ortasha 174 ótinim maquldansa, shekteýler engizilgennen keıin bul kórsetkish 7 esege, ıaǵnı 1 264 ótinimge deıin ósti. Sonymen qatar, bank birqatar kúmándi jaǵdaılardy anyqtady. Ártúrli klıentter bir oftalmologııalyq klınıkamen kelisimshart jasasa da, qujattarda klınıka ár qalada ornalasqan túrli mekenjaılarmen kórsetilgen. Tekserý barysynda bul mekenjaılarda mundaı klınıkanyń joq ekeni belgili boldy, — delingen habarlamada.

Birqatar baǵyt toqtatylǵanyna qaramastan, azamattar BJZQ artyq qarajatty áli de mańyzdy jáne qymbat em túrlerine paıdalana alady. 

— Orfandyq (sırek) aýrýlardy emdeý, rekonstrýktıvtik jáne qalpyna keltirý operatsııalary, radıonýklıdti jáne radıo-ıod terapııa, radıohırýrgııalyq em, protondyq terapııa, — delingen habarlamada. 

Aıta ketelik BJZQ-dan 46 mlrd teńge jymqyrǵan jalǵan stomatologııalardyń bir ıesi ustalǵan edi.