Zeınetaqy jınaǵyn jeke basqarýǵa berý shegi 75%-ǵa deıin artýy múmkin

ASTANA. KAZINFORM — Májilis depýtaty Ashat Aımaǵambetov Biryńǵaı jınaqtaýshy zeınetaqy qoryndaǵy qarajattyń bir bóligin jeke basqarýshy kompanııalarǵa berý múmkindigin keńeıtýdi usyndy.

Jańa túzetýlerge sáıkes, bul shekti 50%-dan 75%-ǵa deıin ulǵaıtyp, azamattarǵa óz jınaǵyn túrli ınvestıtsııalyq strategııalar arqyly ıkemdi basqarýǵa jaǵdaı jasaý kózdelip otyr.

Májilis depýtaty aı saıyn qazaqstandyqtar tabysynyń 10%-yn Biryńǵaı jınaqtaýshy zeınetaqy qoryndaǵy shotqa aýdaratynyn atap ótti. Bul qarajatty Ulttyq bank basqarady.

— Sońǵy jyldary basqarý sapasy jaman emes. Sonymen birge, jınaqtardyń bir bóligin, naqty aıtqanda 50%-yna deıin, tabystylyqty arttyrý jáne táýekelderdi ártaraptandyrý úshin jeke basqarýshy kompanııalarǵa berý quqyǵyn barlyq azamat bile bermeıdi. Árıne, eshteńeni ózgertpeı, qarajatty tolyǵymen Ulttyq bankke senip qaldyrýǵa bolady. Qalaǵan jaǵdaıda ár azamat óz betinshe sheshim qabyldap, jınaǵynyń bir bóligin kásibı basqarýshylarǵa bere alady. Alaıda bul múmkindik ázirge keńinen qoldanylyp otyrǵan joq, — dep jazdy A. Aımaǵambetov Telegram jelisinde.

Depýtat eki negizgi túzetýdi usynyp otyrǵandaryn aıtty.

— Birinshiden, azamattardyń qarajatyn jeke basqarýshy kompanııalarǵa berý shegin qazirgi 50%-dan 75%-ǵa deıin ulǵaıtýdy usynamyz. Bul jerde eń bastysy – mindetteý emes, erikti quqyq ekenin atap ótken jón. Ekinshiden, azamattardyń ózderi tańdaǵan basqarýshy kompanııaǵa, osy jınaqtardy ıkemdi basqarýǵa múmkindik berýdi usynamyz: qarajattyń bir bóligin konservatıvti quraldarǵa, bir bóligin – tabysy joǵary, biraq táýekeli de joǵary quraldarǵa, al bir bóligin – teńgerimdi baǵyttarǵa ornalastyrý múmkindigin berý. ıAǵnı «bári nemese eshteńe» strategııasy emes, sanaly tańdaý berý. Aqsha tek turmaı, jumys isteýi kerek, – dedi Ashat Aımaǵambetov.

Bul – jınaqtaý mindetimen qatar, azamatqa óz qarajatyn basqarý quqyǵyn beretin anaǵurlym jetildirilgen ári ádiletti júıege jasalǵan qadam.

– Qazirgi ýaqytta bizdiń túzetýler talqylaý kezeńinde tur jáne bul bap osy baǵytta belgili bir úmit uıalatady, – dedi depýtat.

Buǵan deıin Qazaqstanda zeınetaqy ómir boıyna tólenýi múmkin ekeni habarlanǵan edi.