Zeınetaqy jınaǵyn jeke basqarýǵa bergende neni eskerý kerek – Súleımenovtiń jaýaby
ASTANA. KAZINFORM — Qyrkúıekten bastap qazaqstandyqtar BJZQ-daǵy zeınetaqy jınaǵyn tolyq kólemde jeke basqarýshy kompanııalarǵa bere alady. Ulttyq bank tóraǵasy Tımýr Súleımenov mundaı tańdaý kezinde neni eskerý keregin aıtty.
Ulttyq bank tóraǵasynyń aıtýynsha, jańa ereje azamattardyń zeınetaqy jınaǵyn mindetti túrde jeke basqarýshy kompanııalarǵa aýdarýy kerek degendi bildirmeıdi. Ár salymshy ózine qolaıly nusqany ózi tańdaıdy.
— Biz bul sheshimdi qoldaımyz, óıtkeni azamattardyń tańdaýy bolýy kerek. Bul barlyq adam jınaǵyn BJZQ-dan alyp, jeke kompanııaǵa berýi tıis degen sóz emes. Sheshimdi ár salymshy ózi qabyldaıdy, — dedi Tımýr Súleımenov.
Onyń sózinshe, jınaǵyn burynǵydaı BJZQ-da qaldyrýdy jón kóretinder de, jeke basqarýshy kompanııany tańdaýdy qalaıtyndar da bar. Ásirese, zeınetke shyǵýyna áli kóp ýaqyt bar azamattar ınvestıtsııalaýdyń belsendirek tásilin tańdaı alady.
— Qazir jeke basqarýshy kompanııalardyń basqarýynda jalpy zeınetaqy aktıvteriniń shamamen 0,5%-y ǵana bar. Ýaqyt óte kele olar turaqty tabys kórsetip, senýge bolatynyn dáleldese, azamattardyń da qyzyǵýshylyǵy arta túsýi múmkin, — dedi spıker.
Sonymen qatar ol kez kelgen ınvestıtsııalyq sheshimniń táýekeli bolatynyn eskertti.
— Basqarýshy kompanııany tańdamas buryn onyń jumys nátıjesi men ınvestıtsııalyq strategııasyn muqııat zerdeleý qajet. Sondyqtan basqarýshy kompanııanyń osy ýaqytqa deıingi jumys nátıjesin, ınvestıtsııalyq strategııasyn jáne ýádelerin muqııat zerdelep baryp sheshim qabyldaý qajet, — dedi Tımýr Súleımenov.
Eske salaıyq, 2027 jyldan bastap zeınetaqy júıesinde birqatar ózgeris engiziletinin jazǵan edik.
