Zeınetaqy jınaǵyn senimgerlik basqarýǵa berý: 15 kúnde 40 myńǵa jýyq ótinish túsken
ASTANA. KAZINFORM – Qazaqstandyqtar 7-22 qyrkúıek aralyǵynda BJZQ-ǵa zeınetaqy jınaqtaryn ınvestıtsııalyq portfeldi basqarýshylarǵa (IPB) berý týraly 39,9 myńǵa jýyq ótinish bergen. Bul týraly Biryńǵaı jınaqtaýshy zeınetaqy qory Kazinform saýalyna bergen jaýabynda aıtqan.
Aıta ketý kerek, 7 qyrkúıekten bastap qazaqstandyqtarǵa zeınetaqy jınaǵyn 100 paıyzǵa deıin jeke kompanııalardyń senimgerlik basqarýyna berý múmkindigi iske qosyldy. BJZQ málimetine súıensek, alǵashqy 15 kúnniń ishinde túsken ótinishterde basqarýǵa beriletin qarajattyń jalpy kólemi shamamen 69,1 mlrd teńge bolǵan.
Munda ótinishter sany men ótinish bergen salymshylardyń sany birdeı emes. BJZQ kestesinde 35 016 ótinish berýshi kórsetilgen. Basqasha aıtsaq, bir salymshy ınvestıtsııalyq portfelin birneshe basqarýshyǵa ártaraptandyryp ornalastyrǵan deýge bolady.
Ótinishter arasynda suralǵan qarajat kólemi boıynsha eń joǵary úles «Sentras Sekıýrıtız» AQ-ǵa tıesili boldy. Jalpy somasy 26,52 mlrd teńge aýdarýdy suraǵan 12 821 ótinish túsken.
Halyk Finance-ke 11 278 ótinish boıynsha 18,35 mlrd teńge, Alatau City Invest-ke 7 189 ótinish boıynsha 10,88 mlrd teńge, BCC Invest-ke 7 140 ótinish boıynsha 11,99 mlrd teńge suralǵan. Tansar Capital-ǵa 1 441 ótinish túsip, suralǵan qarajat kólemi 1,34 mlrd teńge boldy.
BJZQ qarajatty ótinish kelip túsken kúnnen bastap 30 kúntizbelik kún ishinde IPB-nyń senimgerlik basqarýyna aýdarady. Sondyqtan atalǵan 69,1 mlrd teńge – naqty aýdarylǵan qarajat emes, salymshylardyń ótinishterinde kórsetilgen soma.
BJZQ-daǵylar oryndalǵan ótinishter men naqty aýdarylǵan qarajat týraly statıstıka keıin belgili bolatynyn atap ótti.
Buǵan deıin BJZQ jınaǵyn túgel jeke basqarýshylarǵa bergisi keletin qazaqstandyqtar neni bilý kerek ekenin jazǵan edik.
