Zeınetaqy jınaǵyn merziminen buryn alýǵa tyıym salynbaıdy – mınıstrlik

ASTANA. KAZINFORM – Qazaqstandyqtarǵa zeınetaqy qorynda jınalǵan qarjyny sheship alýǵa tyıym salý jospary joq. Bul týraly Eńbek jáne halyqty áleýmettik qorǵaý birinshi vıtse-mınıstri Aqmádı Sarbasov málim etti.

– Zeınetaqy jınaqtaryn merziminen buryn alý mehanızmi birneshe jyl buryn Memleket basshysynyń tapsyrmasymen engizildi jáne qazir kúshinde. Búginde ol eki baǵytty qamtıdy – turǵyn úı jaǵdaıyn jaqsartý jáne emdelý úshin paıdalaný. Zeınetaqy jınaqtarynyń negizgi maqsaty – qartaıǵan shaqta tabysty almastyratyn tıisti koeffıtsıentpen qamtamasyz etý. Sondyqtan biryńǵaı jınaqtaýshy zeınetaqy qoryndaǵy (BJZQ) qarajatty tıimdi ınvestıtsııalaý jáne yntymaqty ári bazalyq zeınetaqy tólemderiniń tıimdiligin arttyrýǵa baǵyttalǵan parametrlik ózgerister engizý sharalary qabyldanyp jatyr, – dedi Aqmádı Sarbasov Májilis qabyrǵasynda BAQ ókilderiniń saýalyna jaýap bere turyp.

Sondaı-aq vıtse-mınıstr buǵan deıin týyndaǵan qarajatty maqsatty paıdalaný, emdeýge jumsalatyn shyǵyndar máselelerimen Densaýlyq saqtaý mınıstrligi aınalysyp jatqanyn aıtty.

– Bul baǵyttaǵy jumys jalǵasýda, alaıda belgilengen parametrler aıasynda eshqandaı shekteýler engizý josparda joq, – dep túsindirdi mınıstrdiń orynbasary.

Eske sala ketsek, byltyr elimizde zeınetaqy jınaǵyn erte sheship alý toqtatylýy múmkindigi týraly aıtylǵan edi.

Sondaı-aq byltyr Ulttyq bank zeınetaqy jınaǵyn alý talaptaryn kúsheıtýdi usyndy.