Zeınetaqy jınaǵyn merziminen buryn alý: jańa jetkiliktilik mejesi jarııalanady
ASTANA. KAZINFORM – QR Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev zeınetaqy jınaǵynyń eń tómen jetkilikti shegin aıqyndaý ádistemesine ózgerister engizýge qatysty túsinik berdi.
- BJZQ jınaǵynyń jetkiliktilik mejesi kóteriletinin naqty aıta alamyn. Qazir tıisti esepteýlerdi júrgizip jatyrmyz. Ulttyq bankpen jáne memlekettik organdarmen konsýltatsııalar jalǵasady. Dál qazir onyń mejesi qaı deńgeıge kóteriletinin naqtylaı almaımyn. Sondyqtan túbegeıli sheshim qabyldanǵan kezde, mindetti túrde BAQ arqyly jarııalaımyz. Bul qadamdar ne úshin jasalyp jatqanyn bilesizder. Bizdiń mindetimiz – azamattarymyzdy qartaıǵan shaǵynda laıyqty zeınetaqymen qamtamasyz etý, - dedi Tuıaqbaev Senattyń jalpy otyrysynan keıin tilshiler suraǵyna jaýap bere otyryp.
Osy oraıda vıtse-mınıstr mamyr aıynyń aıaǵyna qaraı qabyldanǵan sheshim jarııalanatynyn aıta kele, bul jańa talap bıyl kúshine enýi múmkin ekenin jetkizdi.
Eske salsaq, Eńbek jáne halyqty áleýmettik qorǵaý mınıstri Asqarbek Ertaev BJZQ jınaǵynyń jetkiliktilik mejesi qanshaǵa kóteriletini mamyr aıynda belgili bolatynyn aıtty.
Aıta ketý kerek, Ulttyq bank tóraǵasy Tımýr Súleımenov qordaǵy jınaqtan qarajat alý sheginiń tásilderin qatańdatý qajettigin aıtqan bolatyn.
