Zeınetaqy jınaǵyn merziminen buryn alý talaby qatańdatylady
ASTANA. KAZINFORM – Zeınetaqy jınaǵyn merziminen buryn alý talaby qatańdatylady. Sáýirden bastap shotta qalýy tıis jetkiliktilik shegin kóterý josparlanyp otyr. Bul týraly Senat kýlýarynda Eńbek jáne halyqty áleýmettik qorǵaý mınıstri Asqarbek Ertaev málimdedi.
Vedomstvo basshysynyń aıtýynsha, bul sheshim jınaqtardy paıdalaný kóleminiń, ásirese jastar arasynda kúrt artýymen baılanysty bolyp otyr. Mınıstrdiń dereginshe, búginge deıin halyq 5 trıllıon teńgege jýyq jınaǵyn alǵan bolsa, sonyń besten biri – 20 men 35 jas aralyǵyndaǵy azamattardyń enshisinde. Sondyqtan Mınıstrlik jınaqtaý júıesin damytý úshin talaptardy qaıta qaraýdy jón dep sanaıdy.
– Jalpy 5 trln teńgege jýyq qarajat alyndy. Biz sanattar boıynsha taldaý jasadyq, sonyń 1 trln teńgege jýyǵyn jastarymyz, ıaǵnı 20 men 35 jas aralyǵyndaǵy adamdar alǵan. Osy tendentsııany eskere otyryp, Eńbek mınıstrligi eń tómengi jetkiliktilik shegin kóterý qajet dep esepteıdi. Búginde elde 9,7 mln jumys kúshi bolsa, sonyń 2,9 mln-y eshqandaı aýdarym jasamaıdy. Erteń bul azamattar zeınetke shyqqanda eń tómengi bazalyq zeınetaqy – 35 myńnan 80 myń teńgege deıin ǵana alady. Mundaı aqshamen ómir súrý qıyn. Sondyqtan shekti deńgeıdi ulǵaıtýymyz kerek, – dedi Asqarbek Ertaev.
Qazirgi tańda mınıstrlik jańa shekterdi esepteý boıynsha Ulttyq bankpen jáne Qarjy naryǵyn retteý jáne damytý agenttigimen jumys júrgizip jatyr. Bul rette mınıstr jańa esepteý formýlasynyń jobasyn da túsindire ketti.
– Bul shamamen sáýir aıynyń ishinde qarastyrylady. Eger ótken jyly meniń zeınetaqy shotymda 2 mln teńge jınalsa, bıylǵy eń tómengi jetkiliktilik shegi «2 mln + 8% + 2%» bolady. Shamamen 10 paıyzǵa artady da, osy somadan asqan bóligin ǵana alýǵa bolady. Bul barlyq azamatqa ortaq formýla bolmaq, – dep túsindirdi vedomstvo basshysy.
Sonymen qatar Mınıstr zeınetaqy jınaǵyn merziminen buryn alý múmkindigi tolyq joıylmaıtynyn atap ótti. Jınaǵy jetkilikti azamattar burynǵysha emdelýge nemese nesıesin óteýge paıdalana alady, biraq talaptar burynǵydan qatańdatylady.
Aıta keteıik, Otbasy bank zeınetaqy jınaqtaryn emdelýge, sonyń ishinde stomatologııalyq qyzmetterge paıdalaný múmkindigin qaıta engizý boıynsha jumys júrgizip jatqanyn habarlaǵan edi.