Zeınetaqy jınaǵyn merziminen buryn alý baǵdarlamasyn qaıta qaraý kerek - Ulttyq bank zertteýi
ASTANA. KAZINFORM – Ulttyq banktiń Qarjylyq turaqtylyq jáne zertteýler departamenti Zeınetaqy jınaqtaryn merziminen buryn paıdalaný baǵdarlamasynyń jyljymaıtyn múlik naryǵyndaǵy baǵalarǵa áseri týraly zertteý qorytyndysyn jarııalady.
Másele qaıdan shyqty?
Bul bastama 2020 jylǵy Prezıdent Joldaýynda resmı aıtylyp, 2021 jyly arnaıy baǵdarlama kúshine engen bolatyn. Ulttyq bank sarapshylary baspana baǵasynyń ýaqyt bederindegi qubylýyn dál anyqtaý úshin 2020 jylǵy 24 qańtar men 2021 jylǵy 9 jeltoqsan aralyǵyndaǵy 98 aptany taldaǵan.
Atalǵan 343 kúnniń ishinde bir sharshy metr baspananyń ortasha baǵasy Astanada 42 dollarǵa, ózge qalalarda 70 dollarǵa, Qazaqstannyń qalǵan bóliginde 58 dollarǵa ósken. Al Almatydaǵy ósim múlde joǵary - 153 dollar. Bekitilgen satý-satyp alý kelisimsharttarynyń málimeti boıynsha, baǵdarlama bastalǵannan keıin el boıynsha aýdany shaǵyn jyljymaıtyn múlikke suranys artqan.
«Bastamanyń tıimdiligin tereń zertteý kerek»
- Biz satyp alý-satý mámileleri boıynsha memlekettik derekqordy jáne ýaqyt boıynsha alshaqtyq regressııalaý ádisin paıdalana otyryp, baǵdarlamanyń kúshine ený kúnine qatysty 11 aı aralyǵyndaǵy jyljymaıtyn múlik baǵasynyń dınamıkasyn taldadyq. Taldaý nátıjesinde memlekettik ınterventsııa Astanada jyljymaıtyn múlik baǵasynyń – 10%-ǵa, Almatyda 9%-ǵa, qalalarda 13%-ǵa jáne Qazaqstannyń qalǵan bóliginde 14%-ǵa ósýine sebep bolǵanyn anyqtadyq. Biz alǵan nátıjeler zertteletin aralyqtyń ózgeristerine tózimdi ekenin kórsetedi. Bizdiń nátıjelerimiz atalǵan memlekettik bastamanyń tıimdiligin tereńirek zertteý qajettigin aıǵaqtaıdy, - dep jazylǵan zertteý qorytyndysynda.
Sonymen, taldaý nátıjesi zeınetaqy jınaqtaryn alý baǵdarlamasy Qazaqstan boıynsha baǵanyń orta eseppen 9-14%-ǵa ósýine túrtki bolǵanyn kórsetken.
Ulttyq bank zertteýinde atalǵan baǵdarlamaǵa áýel bastan skeptıkalyq turǵyda qaraǵan keıbir sarapshylardyń synymen úndesetin tustar bar.
- Zeınetaqy jınaqtarynda jetkilikti sheginen asatyn aqshasy bar azamattardyń turǵyn úı jaǵdaıyn jaqsartýy jyljymaıtyn múlik qunyn ósirip, saldarynan qalǵan azamattardyń turǵyn úıge qol jetkizý múmkindigi tómendeýi múmkin. Bul jaǵdaı bolashaqta memlekettik qoldaýdyń neǵurlym teńgerimdi tetikterin ázirleý qajet ekeni týraly pikirtalastarǵa negiz bola alady, - dep túıindeıdi Ulttyq bank sarapshylary.
Aıta ketý kerek, dál osy saryndaǵy baǵalaýlar buǵan deıin ózge zertteýlerde de aıtylǵan.
Alaıda Ulttyq bank zertteý buǵan deıingi akademııalyq eńbekterde qoldanylmaǵan derekter negizinde qorytyndy jasaǵanymen erekshelenedi. Naqty aıtsaq, zertteýdiń qorytyndysy jyljymaıtyn múlik naryǵynyń memlekettik derekqorynan alynǵan egjeı-tegjeıli mámile derekteri negizinde jasalyp otyr.
Buǵan deıin muqtaj jandarǵa baspana bólý nelikten ákimdikten «Otbasy bankke» ótkenin taldaǵan edik.