Zeınetaqy jınaǵy esebinen turǵyn úı alýdyń tártibi ózgerdi
ASTANA. KAZINFORM — Qazaqstanda zeınetaqy jınaqtaryn turǵyn úı jaǵdaıyn jaqsartýǵa paıdalaný qaǵıdalaryna ózgerister engizildi. Tıisti buıryqqa Ónerkásip jáne qurylys mınıstriniń mindetin atqarýshy 2026 jylǵy 13 qańtarda qol qoıdy.
— 2026 jylǵy 1 qańtardan bastap arnaıy shot ashylǵannan keıin azamat turǵyn úı jaǵdaıyn jaqsartýǵa arnalǵan birjolǵy zeınetaqy tólemin alý úshin elektrondy ótinish toltyrady. Ótinishte arnaıy shottyń nómiri, qarajatty paıdalaný maqsaty jáne qoljetimdi soma kórsetiledi. Ótinish ótinish berýshiniń elektrondy tsıfrlyq qoltańbasymen rastalady, — delingen qujatta.
Buǵan deıin ótinishte jeke tabys salyǵyn ustap qalý jáne aýdarý tásilderi de kórsetilýi tıis bolatyn.
Jańartylǵan qaǵıdalarǵa saı, birjolǵy zeınetaqy tólemderin turǵyn úı jaǵdaıyn jaqsartýǵa myna maqsattarda paıdalanýǵa bolady:
— turǵyn úı satyp alýǵa alynǵan ıpotekalyq qaryzdyń negizgi qaryzyn tolyq nemese ishinara óteý (bir bank qaryzy sharty aıasynda jóndeý jumystaryn júrgizý de osyǵan kiredi);
— turǵyn úı qurylys jınaqtary júıesi arqyly jeke turǵyn úı salý, sonyń ishinde nysanaly maqsaty jeke turǵyn úı qurylysy nemese jeke qosalqy sharýashylyq sanalatyn jer telimin satyp alý.
Sonymen qatar, birjolǵy zeınetaqy tólemderimen tolyqtyrylǵan turǵyn úı qurylys jınaqtary týraly shart boıynsha quqyqtardy jubaıyna jáne (nemese) jaqyn týystaryna berý múmkindigi saqtalady.
Alaıda mundaı quqyqtardy úshinshi tulǵalarǵa qaıtadan berýine jol berilmeıdi. Aıta ketý kerek, buryn bul norma turǵyn úı qurylys jınaqtary salymy týraly shartqa qatysty qoldanylǵan.
Ózgerister turǵyn úı qurylys jınaq banki arqyly zeınetaqy tólemderin paıdalaný tártibin de naqtylaıdy. Atap aıtqanda, belgilengen merzimde rastaıtyn qujattar usynylmaǵan jaǵdaıda, paıdalanylmaǵan qarajat ótinish berýshiniń BJZQ-daǵy zeınetaqy shotyna qaıtarylady.
— Eger birjolǵy zeınetaqy tólemi arnaıy shottan qate túrde BJZQ-ǵa qaıtarylsa, ýákiletti operator ótinish berýshiniń kelisimin alǵan kúnnen bastap úsh jumys kúni ishinde BJZQ-ǵa elektrondy habarlama joldaıdy, — dep atap ótti bank qate aýdarymdarǵa baılanysty túsinikteme bere otyryp.
Al BJZQ bul habarlamany alǵan sátten bastap bes jumys kúni ishinde qate qaıtarylǵan somany, ótinish berýshiniń jeke zeınetaqy shotyndaǵy qarajat kóleminen aspaıtyn mólsherde, ýákiletti operatorǵa qaıta aýdarady. Keıin bul qarajat ótinish berýshiniń arnaıy shotyna túsedi.
Atalǵan buıryq 2026 jylǵy 31 qańtardan bastap kúshine enedi. Al keıbir normalar 2026 jylǵy 1 qańtardan bastap qoldanyla bastaıdy.
Aıta keteıik, buǵan deıin Qazaqstanda 2026 jyly turǵyn úı baǵasy qalaı ózgergenin jazǵan edik.