Zeınetaqy jınaǵy esebinen emdelýge ótinim qabyldaý ýaqytsha toqtatyldy
ASTANA.KAZINFORM - 2026 jylǵy 12 qańtar saǵat 19:00-den bastap enpf-otbasy.kz platformasynda bir rettik zeınetaqy tólemderi (BZT) esebinen medıtsınalyq qyzmet alýǵa arnalǵan ótinimderdi qabyldaý ýaqytsha toqtatylady. Bul týraly Kazinform agenttigi habarlaıdy.
Otbasy bank málimetinshe, mundaı sheshim zeınetaqy jınaqtaryn emdeýge paıdalaný talaptaryn qaıta qaraýǵa baılanysty qabyldanǵan. Qazirgi ýaqytta jumys Qazaqstan Respýblıkasynyń Densaýlyq saqtaý mınıstrligimen jáne ózge de múddeli memlekettik organdarmen birlesip júrgizilip jatyr.
Atalǵan sharalar aıasynda BZT arqyly medıtsınalyq qyzmet alý sharttaryn ózektendirý, sondaı-aq aqparattyq júıelerdi yqpaldastyrý tetikterin pysyqtaý kózdelgen. Bul qadamdar zeınetaqy qarajatynyń maqsatsyz jumsalýyna jol bermeýge jáne rásimderdiń ashyqtyǵyn arttyrýǵa baǵyttalǵan.
Ótinim qabyldaý qashan qaıta bastalatyny jóninde qosymsha habarlanady.
Aıta keteıik, buǵan deıin bir aıdyń ishinde qazaqstandyqtar radıohırýrgııalyq em alýǵa 5,6 mlrd teńge kóleminde zeınetaqy tólemin alǵany habarlanǵan bolatyn.
Sondaı-aq ótken jyly azamattarǵa zeınetaqy jınaqtaryn plastıkalyq operatsııalarǵa paıdalanýǵa tyıym salynǵany belgili.
BJZQ zeınetaqy jınaǵynyń eń tómengi jetkiliktilik shegin 10 paıyz kóterdi.