Zeınetaqy jınaǵy bar jumysshy qazaqstandyqtar ǵana eńbekpen qamtylǵan bolyp esepteledi

ASTANA. KAZINFORM — Jyl sońyna deıin 500 myńǵa jýyq adamdy jumyspen qamtý jospary bar. Bul týraly Eńbek jáne halyqty áleýmettik qorǵaý vıtse-mınıstri Asqar Bıahmetov málim etti.

— Bıyl birinshi jartyjyldyqta 250 myń azamat jumysqa ornalasty, onyń ishinde 134 myń adam turaqty eńbekpen qamtyldy. Sol sııaqty ulttyq jobalar men salalyq tujyrymdamalar aıasynda 4,6 myńǵa jýyq azamat jumyspen qamtyldy. Memleket basshysynyń «10 myń adamǵa shaqqanda 100 jańa jumys orny» bastamasy aıasynda shamamen 63 myń adam, jumys berýshiler usynǵan bos jumys oryndaryna 67 myń adam, jumyspen qamtýǵa járdemdesýdiń belsendi sharalary aıasynda 116 myńnan astam adam jumysqa ornalasty, — dedi Asqar Bıahmetov ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq vıtse-mınıstr jyl sońyna deıin 480 myń adamdy jumysqa ornalastyrý jospary týraly aıtty. 

— Mınıstrliktiń aqparattyq júıesi arqyly mindetti zeınetaqy jarnasy bar azamattardyń jumysqa ornalasýyna monıtorıng júrgizilip jatyr. Endi jumyspen qamtylǵandar qataryna tek mindetti zeınetaqy jarnasy bar azamattar ǵana engiziledi, — deıdi mınıstrdiń orynbasary.

Buǵan deıin 4 kúndik jumys aptasy jaǵdaıynda qazaqstandyqtardyń jalaqysy qalaı esepteletini týraly jazǵan edik.