Zeınetaqy jınaǵy: 4 jeltoqsanǵa deıin berilgen oftalmologııalyq ótinishter qabyldanady
ASTANA. KAZINFORM — Zeınetaqy jınaǵynan aqsha alýdy shekteıtin jańa tyıym engizildi.
4 jeltoqsannan bastap enpf-otbasy.kz platformasy Birjolǵy zeınetaqy tólemi esebinen oftalmologııalyq qyzmetti tóleýge arnalǵan ótinishti qabyldamaıdy.
— Ózderińiz bilesizder, 15 qyrkúıek kúninen bastap stomatologııalyq qyzmetterge ótinimderdi qabyldaýdy toqtatqan edik. Sodan keıin oftalmologııalyq ótinimder kóp túse bastady. Kóptegen kúdikti jaǵdaı da boldy. Biz resmı operator ókili retinde kúdikti jaǵdaılar bolǵan kezde mindetti túrde ol týraly eskertýimiz kerek. Sol sebepti DS mınıstrliginiń buıryǵy aıasynda 4 jeltoqsannan bastap oftalmologııalyq qyzmetter boıynsha ótinim qabyldaýdy doǵardyq, - deıdi «Búgin LIVE» stýdııasyna bergen onlaın suhbatynda «Otbasy bank» AQ baspasóz hatshysy Nazerke Ǵalym.
Maman kúdik týdyrǵan oqıǵa týraly aıtyp berdi.
— Osy jyly ártúrli azamattardan ótinim tústi. Biraq ol azamattardyń klınıkalarynyń ataýy bir klınıka bolyp shyqty. Tek qana qujattarynda mekenjaılary ártúrli qala dep kórsetilgen. Bizdiń qyzmetkerler ár qujatty muqııat qaraǵandyqtan kúdikke ilindi. Keıin bizdiń qyzmetkerler bul mekenjaılarǵa baryp kórdi. Qujatta kórsetilgen mekenjaılar boıynsha eshqandaı klınıka bolmaı shyqty. Biz óz tarapymyzdan jaǵdaı týraly habarladyq, - deıdi spıker.
Al 3 jeltoqsanǵa deıin berilgen ótinishter kúshin joımaıdy.
— Olardyń bári kezek boıynsha qaralady. Sebebi ol kezde buıryq shyqpaǵan. Sol sebepti qabyldanady. Qazirgi ýaqytta oftalmologııa baǵyty boıynsha jalpy somasy 13 mlrd teńge bolatyn 15 800-deı ótinim kelgen. Onyń ishinde tekserilip jatqandary bar. Klıentterdiń birazynan qujat kútip otyrmyz. Olar qujattardy tolyq tapsyrǵanda ótinishi boıynsha beriledi. «Otbasy banki» tek qujat boıynsha jumys isteıdi. Eger mınıstrlik tarapynan tizimnen shyǵarylǵan baǵyttardy qaıta qosý týraly buıryq kelse, biz sol buıryq aıasynda jumysymyzdy jalǵastyramyz, - deıdi Nazerke Ǵalym.
Aıta keteıik, Prezıdent zeınetaqy júıesin jáne kóshi-qon saıasatyn jetildirýdi tapsyrdy.