Zeınetaqy tólemderinen 20% ustalynyp qalady degen ras pa

ASTANA. KAZINFORM – Eńbek jáne halyqty áleýmettik qorǵaý mınıstrligi áleýmettik jeliler men beınehostıngterde taralyp jatqan zeınetaqy tólemderinen 20% ustap qalý engizildi degen aqparat shyndyqqa janaspaıtynyn aıtty.

— Belgisiz tulǵalardyń deepfake tehnologııalaryn paıdalana otyryp, yntymaqty zeınetaqy tólemderi 20%-ǵa qysqartylady degen jalǵan málimeti bar beınerolıkter taratyp jatqanyn habarlaımyz.

Eske salamyz, 2026 jylǵy 1 qańtardan bastap bazalyq jáne yntymaqty zeınetaqy mólsheri Ulttyq bank aıqyndaıtyn ınflıatsııanyń boljamdy deńgeıine sáıkes 10%-ǵa arttyryldy, — delingen Eńbekmıni habarlamasynda.

Sonymen qatar Memleket basshysynyń tapsyrmasyna sáıkes, 2023 jyldan bastap bes jyl ishinde jyl saıyn kezeń-kezeńimen eń tómengi bazalyq zeınetaqy mólsheri eń tómen kúnkóris deńgeıiniń 70%-yna deıin, al eń joǵary mólsheri 120%-yna deıin ulǵaıtylyp otyr.

Osylaısha, 2026 jylǵy 1 qańtardan bastap bazalyq zeınetaqynyń eń tómengi mólsheri 35 596 teńgeni (kúnkóris deńgeıiniń 70%-y), al eń joǵary mólsheri kúnkóris deńgeıiniń 110%-ynan 118%-yna deıin ulǵaıtylyp, 60 005 teńge boldy.

— Azamattardy tek resmı aqparat kózderine senýge shaqyramyz. Qasaqana jalǵan aqparat taratqany úshin zańnamaǵa sáıkes jaýapkershilik kózdelgenin eske salamyz, — delingen habarlamada.

Aıta ketelik Qazaqstan Ulttyq banki tsıfrlyq teńgege qatysty jalǵan ınvestıtsııalyq usynystar arqyly jasalatyn alaıaqtyq shemalardyń kóbeıgenin málimdegen edi.