Zeınetaqy shottarynda ınvestıtsııalyq tabys nege tómendedi – Ulttyq bank túsinik berdi
ASTANA. KAZINFORM — Ulttyq bank Monetarlyq operatsııalar departamentiniń dırektory Nurjan Tursynhanov zeınetaqy shottarynda ınvestıtsııalyq tabystyń tómendeýi sebebin túsindirdi.
— 2025 jyldyń birinshi toqsanynda zeınetaqy salymshylary óz shottarynda ınvestıtsııalyq tabystyń tómendegenin baıqady. Alaıda bul jaǵdaı ýaqytsha sıpatqa ıe, sondyqtan alańdaýǵa negiz joq. Tómendeý úrdisi zeınetaqy aktıvteri qaıta baǵalanǵandyqtan oryn boldy. Atap aıtqanda, teris ınvestıtsııalyq tabystyń negizgi sebepteriniń biri — ınflıatsııa men ınflıatsııalyq boljamdar boıynsha kórsetkishterdiń ósýi aıasynda memlekettik baǵaly qaǵazdar kiristiliginiń artýy. Bul óz kezeginde olardyń naryqtaǵy qunyn tómendetti. Sonymen qatar, Qarjy mınıstrligi tarapynan osy baǵaly qaǵazdar kóp usynylǵandyqtan, ol da naryqtaǵy baǵaǵa áser etti, — dedi Nurjan Tursynhanov elordada zeınetaqy aktıvterin ınvestıtsııalaý taqyrybyna arnalǵan baspasóz máslıhatynda.
Onyń sózine qaraǵanda, ınvestıtsııalyq tabysqa AQSh dollaryna qatysty teńge baǵamnyń qubylmalylyǵy da áser etti. 2025 jyldyń basynda dollar baǵamy 525,11 teńge bolsa, naýryzda 504,44 teńgege baǵalandy.
— Osy jerde atap óterligi, teńge nyǵaıǵan kezde, shetel valıýtasyndaǵy aktıvterdiń teńgemen eseptegendegi quny ýaqytsha tómendeıdi. Bul esepteýlerde teńgemen kórsetilgen mánde shyǵyn retinde kórinis tabady. Jyl basynan beri tirkelgen teris ınvestıtsııalyq tabys — esep túrindegi ǵana málimet, ıaǵnı túbegeıli shyǵyn bolyp sanalmaıdy. Bul — aktıvter qunynyń ýaqytsha qubylýyna baılanysty qalyptasqan kórsetkish. Qarjy naryǵyndaǵy jaǵdaı turaqtalǵan saıyn, bul aktıvterdiń quny qaıta qalpyna keledi. Máselen, aldyn ala málimetterge sáıkes, sáýir aıynyń tek alǵashqy aptasynda ǵana teńge baǵamynyń qubylmalylyǵy men syrtqy naryqtardaǵy ózgeristerdiń nátıjesinde ınvestıtsııalyq tabys kólemi shamamen 400 mlrd teńge boldy. Bul óz kezeginde qańtar–naýryz aılaryndaǵy teris ınvestıtsııalyq tabysty aıtarlyqtaı óteýge múmkindik berdi, — dedi departament dırektory.
Onyń aıtýynsha, 2024 jylǵy sáýirden 2025 jylǵy naýryzǵa deıingi sońǵy 12 aıdaǵy kiristilik kórsetkishiniń qysqamerzimdi aýytqýlaryna qaramastan, aldyn ala málimetter boıynsha eseptelgen ınvestıtsııalyq tabys kólemi shamamen 2,4 trln teńge boldy. Osy kezeńdegi kiristilik 11,99% bolsa, 2025 jylǵy aqpan aıynyń sońyndaǵy ınflıatsııa 10% deńgeıinde qalyptasty. Al, 2024 jyldyń qorytyndysy boıynsha tabys 17,84% bolyp, ınvestıtsııalyq tabys kólemi 3,4 trln teńgege jetti. Bul kezeńde ınflıatsııa 8,6% boldy. Osylaısha, salymshylar úshin 9,24% mólsherinde naqty tabys qamtamasyz etildi.
Budan buryn habarlanǵandaı, 2014 jyldan beri zeınetaqy aktıvteri 5 eseden asa ósti.