Zeınetaqy sheginiń ósýi ıpotekaǵa suranysty tómendetken joq — Otbasy bank
ASTANA. KAZINFORM — 2026 jylǵa arnalǵan zeınetaqy jınaqtarynyń eń tómengi jetkiliktilik sheginiń ulǵaıýy qazaqstandyqtardyń ıpotekalyq nesıege suranysyna aıtarlyqtaı áser etken joq. Bul týraly Úkimettegi brıfıngte «Otbasy bank» AQ basqarma tóraǵasy Lázzat Ibragımova málim etti.
Onyń aıtýynsha, jańa shekter engizilgennen keıin de bankke kelip jatqan qarajat kólemi azaımaǵan. Tipti bıylǵy kórsetkish ótken jylmen salystyrǵanda 20 paıyzǵa joǵary.
— Jyl basynan beri turǵyn úı qurylys jınaqtaryna 800 mlrd teńge tústi. Zeınetaqy jınaqtarynyń basym bóligi osy depozıtterdi tolyqtyrýǵa jumsaldy. Sonyń arqasynda azamattar baspana alýǵa qajetti jınaq qoryn qalyptastyryp jatyr. Shilde men tamyz aılarynda da suranys birqalypty saqtaldy. Tipti tamyzdyń sońynda ıpotekalyq ótinimderdiń kóbeıgenin kórip otyrmyz, — dedi Lázzat Ibragımova.
Bank basshysynyń aıtýynsha, tamyz aıynda ıpotekaǵa ótinimderdiń kóbeıýi «1 qyrkúıek áserimen» baılanysty bolýy múmkin. ıAǵnı, balalary joǵary oqý oryndaryna túsken ata-analar stýdentter oqıtyn qalalardan baspana satyp alýǵa kirisken.
— Qazir óńirlerden iri qalalarǵa keletin klıentterdiń kóbeıgenin baıqap otyrmyz. Olar elimizdiń jetekshi ýnıversıtetteri ornalasqan qalalardan turǵyn úı alý úshin ıpotekalyq ótinim berip jatyr. Bul — jańa baǵdarlamalardyń qatysýshylary emes. Olar uzaq ýaqyt boıy óz qarajatyn jınap kelgen azamattar. Balalary 18 jasqa tolǵanda turǵyn úı máselesi týyndaıtynyn aldyn ala eskergen. Sondyqtan zeınetaqy jınaqtarynyń jetkiliktilik sheginiń aıtarlyqtaı ósýine baılanysty qandaı da bir ózgeristi baıqap otyrǵan joqpyz, — dedi ol.
Sonymen birge, ıpotekalyq ótinimder boıynsha bas tartý deńgeıi ózgermegen. Lázzat Ibragımova ótinimderdi qaraý kezinde bank skorıngtik júıeni qoldanatynyn eske saldy. Júıe sheshimdi qaryz alýshynyń nesıe tarıhy negizinde avtomatty túrde qabyldaıdy.
— Barlyq qazaqstandyqtarǵa eskerterim: mundaı kezeńde mıkroqarjy uıymdaryndaǵy qaryzdar, lombardtaǵy nesıeler nemese bólip tóleý qyzmetteri boıynsha tipti bir kúndik keshiktirýdiń ózi skorıngtik balǵa áser etýi múmkin. Azamattar maǵan basqarma tóraǵasy retinde de, e-Otinish arqyly da, áleýmettik jeliler arqyly da jıi júginedi. Biz olarǵa skorıngtik júıege eshkim aralasa almaıtynyn túsindiremiz. Júıe adamnyń búkil nesıe tarıhyn eseptep, sonyń negizinde baǵasyn tómendetýi múmkin, — dedi bank basshysy.
Buǵan deıin Otbasy bank basshysy turǵyn úı kezegindegi zańsyzdyqtyń mán-jaıyn túsindirgen edi.
