Zeınetaqy reformasy: Polıtseıler jappaı zeınetke shyǵyp jatyr ma
ASTANA. KAZINFORM — Іshki ister mınıstriniń orynbasary Igor Lepeha zeınetaqy reformasyna baılanysty polıtsııa qyzmetkerleriniń jappaı zeınetke shyǵýyna qatysty aqparatqa túsinikteme berdi.
Úkimet otyrysynan keıingi baspasóz máslıhatynda BAQ ókilderi Іshki ister mınıstri orynbasarynan: «Qazaqstanda quqyq qorǵaý organdary qyzmetkerlerin zeınetaqymen qamtý júıesine eleýli ózgerister engizýge daıyndyq júrip jatqany týraly aqparat bar. Atap aıtqanda, aldaǵy ýaqytta polıtsııa qyzmetkerleriniń zeınetaqysy ındeksatsııalanbaıdy degen aqparat tarady. Osyǵan baılanysty qazir kóptegen qyzmetker ózgerister ózderine áser etpeýi úshin jappaı zeınetke shyǵyp jatyr degen de málimet bar. Bul aqparat qanshalyqty shyndyqqa janasady?», — dep suraǵan edi.
Igor Lepeha bul másele ishki ister organdarynyń qyzmetkerleri arasynda keńinen talqylanǵanyn jasyrǵan joq.
— Rasynda, Eńbek mınıstrligi jalpy zeınetaqy reformasyna ózgerister engizý máselesin pysyqtady. Onyń ishinde ishki ister organdary qyzmetkerlerine qatysty zeınetaqy zańnamasyn ózgertý máselesi de qaraldy. Biz kezdesýler men talqylaýlar barysynda atalǵan máselege qatysty ustanymymyzdy bildirdik. Qazirgi tańda qoldanystaǵy zeınetaqymen qamtý modeli negizinen barlyq qyzmetkerdi qanaǵattandyratynyn, sondyqtan olardyń jaǵdaıyn eshbir jaǵdaıda nasharlatýǵa bolmaıtynyn aıttyq. Keıin bul másele kún tártibinen alynyp, ári qaraı talqylanǵan joq. Naqtylap aıtsam másele vıtse-premerlerdiń biriniń deńgeıinde qaralyp, keıin kún tártibinen alyndy. Odan keıin taraǵan aqparattyń barlyǵy — jalǵan aqparat, — dedi mınıstr orynbasary.
Onyń aıtýynsha, áleýmettik jelilerde taraǵan málimetterdi teksergen kezde olardyń arasynda tipti quqyq qorǵaý organdarynyń qyzmetkerleri jazbaıtynyn aqparattar kezdesken.
— Munyń ne úshin jasalǵanyn bilmeımin. Múmkin, polıtsııa qyzmetkerleriniń moraldyq jaǵdaıyna keri áser etý úshin shyǵar. Biraq qazirgi tańda bul másele talqylanyp jatqan joq. Búgin aıtarym — osy, — dedi Igor Lepeha.
Qazaqstandyqtar baspana máselesin sheshý úshin zeınetaqy tólemderinen 27,5 mlrd teńge jumsady.
