Zeınetaqy men járdemaqynyń 70%-yn paıdalaný tártibi ózgermek
ASTANA. KAZINFORM — Qazaqstanda memleket tarapynan tolyq qamtamasyz etiletin azamattardy qarjylandyrý júıesin jetildirý usynylyp otyr.
Tıisti ózgerister bir shyǵynnyń eki ret qarjylandyrylýyna jol bermeýge, bıýdjet qarajatyn tıimdi paıdalanýǵa jáne zańnamada kózdelgen áleýmettik kepildikterdi saqtaýǵa baǵyttalǵan.
Qazirgi tańda atalǵan ortalyqtarda turatyn azamattardyń turýyna jáne qajettilikterine baılanysty shyǵystar memleket qarajaty esebinen tolyq óteledi. Olardyń turýy, tamaqtanýy, kıim-keshegi, áleýmettik qyzmetteri, medıtsınalyq kómegi men kútimi zańnamada belgilengen kólemde bıýdjet qarajaty esebinen qamtamasyz etiledi. Memlekettik qamtamasyz etý qylmystyq-atqarý júıesi mekemelerinde otyrǵan azamattarǵa da qarastyrylǵan.
— Qoldanystaǵy tártip boıynsha zeınetaqy tólemderi men memlekettik áleýmettik járdemaqylar bólinedi. Tólemniń 30%-y tikeleı azamatqa beriledi jáne onyń jeke qarajaty bolyp qalady. Al qalǵan 70%-y ortalyqtyń arnaıy shotyna aýdarylady. Bul qarajat áleýmettik qyzmet alýshylardy qamtamasyz etýge baılanysty qosymsha shyǵyndarǵa, onyń ishinde qosymsha tamaqtanýǵa, jumsaq kerek-jaraqtarǵa jáne zańnamada kózdelgen basqa da qajettilikterge jumsalady.
Sonymen birge tolyq memlekettik qamtamasyz etýdegi azamattardy ustaýǵa arnalǵan negizgi shyǵyndar memlekettik bıýdjet esebinen ótelip qoıǵan. Osyǵan baılanysty bir shyǵyndy eki ret qarjylandyrýǵa jol bermeý úshin zeınetaqy tólemderi men memlekettik áleýmettik járdemaqylardyń 70%-yn paıdalaný tártibin ózgertý usynylyp otyr, — delingen Eńbekmıni habarlamasynda.
Bul rette azamattyń óz qaramaǵynda qalatyn qarajat kólemi ózgermeıdi. Qazirgi tártiptegideı, tıisti zeınetaqy tólemi nemese memlekettik áleýmettik járdemaqynyń 30%-y azamatqa jeke qajetine jumsaý úshin beriledi.
— Qalǵan 70%-yn memleket tarapynan burynnan qarjylandyrylyp otyrǵan shyǵyndardy qaıta óteýge baǵyttamaý usynylady. Únemdelgen bıýdjet qarajaty áleýmettik mańyzy bar jobalardy iske asyrýǵa, halyqty áleýmettik qorǵaý júıesin damytýǵa jáne áleýmettik qyzmetterdiń sapasyn arttyrýǵa baǵyttalýy múmkin, — delingen habarlamada.
Mańyzdysy, usynylyp otyrǵan ózgerister azamattarǵa kórsetiletin memlekettik qamtamasyz etý kólemin qysqartýdy kózdemeıdi. Azamattardyń turýy, tamaqtanýy, kútimi, medıtsınalyq kómegi jáne zańnamada kózdelgen basqa da áleýmettik qyzmetteri belgilengen tártippen burynǵydaı memleket esebinen qamtamasyz etiledi. Jańa tártip azamattyń tolyq memlekettik qamtamasyz etýde bolǵan kezeńinde ǵana qoldanylady.
Azamat arnaýly áleýmettik qyzmet kórsetý ortalyǵynda turýyn toqtatqannan keıin nemese qylmystyq-atqarý júıesi mekemesinen bosatylǵannan keıin jasyna baılanysty zeınetaqy, eńbek sińirgen jyldary úshin zeınetaqy nemese memlekettik áleýmettik járdemaqy tolyq kólemde, ıaǵnı 100% mólsherinde qaıta tólenedi.
Osylaısha, azamattardyń qazirgi tártip boıynsha óz qaramaǵynda qalatyn qarajat úlesi, ıaǵnı, tıisti tólemniń 30%-y saqtalady. Negizgi ózgeris qalǵan 70%-yn paıdalaný tártibine qatysty. Bul bir shyǵynnyń eki ret qarjylandyrylýyna jol bermeýge, memlekettik qarajatty tıimdi paıdalanýǵa jáne azamattardyń áleýmettik kepildikterin saqtaýǵa baǵyttalǵan.
Aıta ketelik BJZQ ortasha zeınetaqy tóleminiń mólsherin ataǵan edi.
