Zeınetaqy qoryndaǵy aqshany tis emdeýge jumsaýǵa tyıym salynady

ASTANA. KAZINFORM — Protezdeý jáne tis ımplantattaý boıynsha qymbat turatyn stomatologııalyq qyzmetterge qarajat paıdalanýdy 2024 jylǵy 10 tamyz ben 2025 jylǵy 1 aqpan aralyǵynda ýaqytsha toqtata turý josparlanyp otyr. 

Birjolǵy zeınetaqy tólemderi jónindegi ýákiletti operator «Otbasy bank» AQ málimetine sensek, Biryńǵaı jınaqtaýshy zeınetaqy qorynan qarajatty stomatologııalyq qyzmetterge paıdalaný kezinde nysanaly emes shyǵarý jaǵdaılary tirkelgen.

Banktiń málimetinshe, ol júrgizgen qyzmettik tekserýlerdiń barysynda jalǵan qujat paıdalaný jáne naqty medıtsınalyq qyzmetterdi kórsetpeý faktileri anyqtaldy.

Osyǵan baılanysty QR Densaýlyq saqtaý mınıstrligi 2021 jyly 15 aqpanda qabyldanǵan «Emdeýge birjolǵy zeınetaqy tólemderin paıdalaný qaǵıdalaryn bekitý týraly buıryqqa ózgerister engizý týraly» buıryqtyń jobasyn ázirledi. 

Osy buıryq arqyly protezdeý jáne tis ımplantattaý boıynsha qymbat turatyn stomatologııalyq qyzmetterge qarajat paıdalanýdy 2024 jylǵy 10 tamyzdan 2025 jylǵy 1 aqpanǵa deıin *alty aı merzimge ýaqytsha toqtata turý kózdelip otyr. 

Osy ýaqyttyń ishinde birjolǵy zeınetaqy tólemderi jónindegi ýákiletti operator BJT qarajatyn maqsatsyz paıdalanýǵa jol bermeý jáne stomatologııalyq qyzmetter kórsetýdiń ashyqtyǵyn qamtamasyz etý jóninde tıisti jumys júrgizýge nıetti.

Buıryqtyń jobasy 2024 jylǵy 24 shildede talqylaý úshin ashyq normatıvtik quqyqtyq aktiler portalynda ornalastyryldy.