Zeınetaqy qoryndaǵy 184 mlrd teńge vagon alýǵa jumsalady – Kólik mınıstri
ASTANA. KAZINFORM – QR Kólik mınıstri Marat Qarabaev BJZQ qarajaty esebinen satyp alynatyn vagondar Qazaqstanda óndiriletinin aıtty.
«Zeınetaqy qorynan vagondardy satyp alýǵa qarjy bólinedi degen másele qoǵamda qyzý talqylanyp jatyr. Shynynda da zeınetaqy qorynan «Báıterek» holdıngi qarjy aldy. Sonyń ishinde vagondarǵa 184 mlrd teńge jumsalyp otyr. Oǵan jolaýshylardy tasymaldaıtyn 100 vagon, sondaı-aq júk tasymaldaıtyn úsh myń vagon alynyp jatyr. Zeınetaqy qorynda qarajaty jumsalǵan azamattarǵa bul mindetti túrde paıda ákeledi. Bul rette, birinshi másele halyqtyń sol jaqtaǵy aqshasy elge, jurtqa paıda ákeledi. Óıtkeni bul naryqtyq paıyzben alynǵan aqsha, ıaǵnı «Báıterekke» jeńildetilgen aqsha berilgen emes. Ekinshiden, basqarýshy holdıng memlekettiń menshiginde. Sondyqtan ol aqshany qaıta qorǵa aınalyp kelip túsýine memleket tolyq kepildik beredi. Úshinshiden, vagondar otandyq zaýyttardan satyp alynady», - dedi M.Qarabaev Parlament Májilisinde tilshiler suraǵyna jaýap bere otyryp.
Osy oraıda mınıstr vagondar el ıgiligine paıdalanylatynyn aıtty. Jolaýshylardy tasymaldaıtyn vagondardy Petropavldaǵy ZIKSTO kompanııasy jasaıdy. Sondaı-aq júk vagondaryn Ekibastuzdaǵy kompanııadan alý josparlanǵan.
