Zeınetaqy qorynan zańsyz alynǵan aqsha keri qaıtarylmaıdy

ASTANA. KAZINFORM – Jalǵan stomatologııalyq klınıkalar arqyly zeınetaqy qorynan zańsyz alynǵan 200 mlrd teńge keri qaıtarylmaıdy. Azamattarǵa da esh talap qoıylmaıdy. QR Qarjylyq monıtorıng agenttigi tóraǵasynyń orynbasary Jeńis Elemesov bul jaǵdaıda naqty kimderdiń jaýapqa tartylatynyn aıtyp berdi.

Onyń aıtýynsha, halyqqa bul aqshany qorǵa qaıtarýdyń qajeti joq. Munda qordan zańsyz aqsha shyǵarýmen aınalysqandar ǵana qylmystyq jaýapqa tarylady.

– Biryńǵaı jınaqtaýshy zeınetaqy qory bul qarajatty ınvestıtsııalap, zeınet jasyna deıin ınvestıtsııalyq tabys tabý múmkindiginen aıyryldy. Sondyqtan bul jaǵdaıda jábirlenýshi tarap – BJZQ. Azamattarǵa eshqandaı talap qoımaımyz, olar óz aqshalaryn aldy. Iá, merziminen buryn aldy. Biraq qarajatty zańsyz shyǵarýmen aınalysqan tulǵalar qylmystyq jaýapqa tartylady. Búgingi kúni birqatar tulǵa qamaýǵa alyndy, is tergelip jatyr, - dedi Jeńis Elemesov Májilis kýlýarynda.

Agenttik ókiliniń dereginshe, qazir qylmystyq is tergeýi tek Atyraý oblysyndaǵy klınıkalar boıynsha júrip jatyr. Degenmen basqa óńirlerde de ondaı qylmystyq ister bolýy múmkin.

– Atyraý oblysy boıynsha 5 top qylmys jasap, 200 mıllıardtan astam aqshany qordan zańsyz alǵan. Ol jerde qazir 7 adamdy qamaýǵa aldyq. Taǵy biraz adam kúdikke ilindi, jaqynda olar boıynsha sheshim qabyldaımyz. Kópshiligi – jalǵan klınıka qurǵandar. Olardyń esh jabdyǵy bolmaǵan, zańsyz túrde lıtsenzııa alyp, qujattardy qoldan jasaý arqyly zeınetaqy qorynan qarajat alýǵa múmkindik jasaǵan. Lıtsenzııa bergen jáne bul qyzmetti baqylaýǵa tıis ýákiletti organdarǵa tergeý barysynda quqyqtyq baǵa beriledi, - dedi Jeńis Elemesov.

Eske sala ketsek, Qazaqstanda stomatologııalyq qyzmetterge aqy tóleý úshin zeınetaqy jınaqtaryn paıdalanýǵa ótinish qabyldaý toqtatyldy. Shekteý 15 qyrkúıekten bastap kúshine endi. 

BJZQ-dan zańsyz aqsha shyǵarǵan tis dárigerleriniń múlki tárkilenip jatyr.