Zeınetaqy qorynan ınfraqurylymdyq nysandarǵa 1,5 trln teńge nege bólinedi – mınıstr jaýaby

Premer-Mınıstrdiń orynbasary – Qarjy mınıstri Erulan Jamaýbaev zeınetaqy qarajatynan ınfraqurylymdyq nysandarǵa nege 1,5 trln teńge bólinetinin jáne nege respýblıkalyq bıýdjet qarjysyn paıdalanýǵa bolmaıtynyn túsindirdi, dep habarlaıdy Kazinform.

«Zeınetaqy qorynan aqsha jumsalmaıdy, ınvestıtsııalanady. Bizde memlekettik baǵaly qaǵazdarǵa, kvazımemlekettik sektordyń baǵaly qaǵazdaryna, basqa da quraldarǵa 17 trln teńgeden astam ınvestıtsııa salynady. Onyń shamamen 30%-y shetelde ınvestıtsııalanady. Ulttyq bankpen jáne "Báıterek" holdıngimen birge talqylanyp jatqan usynys osy zeınetaqy jınaqtarynyń bir bóligin ekonomıkany damytý úshin sınergetıkalyq effekt ákeletin jaqsy iri jobalardy qarjylandyrýǵa baǵyttaý bolyp otyr. Osy jobalardan jumys oryndary qurylyp, salyq tólenedi jáne joba tolyǵymen ózin aqtaıdy», - dedi Erulan Jamaýbaev Úkmiet úıinde ótken brıfıngte.

Premer-Mınıstrdiń orynbasary qazaqstandyqtardyń jınaqtary saqtalatynyn, oǵan memleket kepildik beretinin aıtty.

«Premer-Mınıstr memlekettiń kepildik beretinin aıtty, tipti fors-major nemese joba sátsizdikke ushyrasa, memleket báribir siz ben bizdiń jınaqtarymyzǵa kepildik beredi. Biz bul aqsha úshin alańdamaýymyz kerek. Mindetterdiń biri – ekonomıkaǵa ınvestıtsııa salý. BJZQ qarajaty uzaq merzimdi jınaqtaýdy bildiretindikten, biz bul aqshany ekonomıkaǵa jaqsy jobalardy nesıeleý úshin durys paıdalanýymyz kerek», - dep túsindirdi Erulan Jamaýbaev.